विधानसभा सत्र मा अंकिता कतल क मामला मा गलत ब्वन फर प्रेमचन्द्र अग्रवाल कु फूकी पुतला

ऋषिकेश। अंकिता क कतल क मामला मा गलत ब्वन फर आन्दोलकारियेां न वित्त अर संसदीय कार्य मंत्री प्रेमचन्द्र अग्रवाल कु पुतला फूकि क अपडु सिरड़ (गुस्सा) दिख्यें।

बतै दियां क ब्याली विधानसभा सत्र मा वित्त मंत्री संसदीय कार्य मंत्री प्रेमचन्द्र अग्रवाल न वनंतरा रिजॉर्ट कु मामला मा बोलि छायीं कि वख क्वीं भि वीआईपी नी मिलि, उन्न बोलि कि वख उबरा (कमरा) कु नौं वीआईपी च। जैमा रकण वळा मनखि थैं वीआईपी ब्वलें जान्द।
जै कारण से रूस्यां युवा संघर्ष समिति क झण्डा क ताल आंदोलनकारियों न आज मंडी हरद्वारा रोड ऋषिकेश मा ऊंकु पुतला जगे।

बतै दियां कि अंकिता कतल कु मामला मा वीआईपी क नौं बत्यें जाण अर ऐ कतल क मांग सीबीआई बटि करौंणा क मांग थैं लेकैकि 49 दिन बटि आंदोलन चलणु च।

आंदोलनकारियों न बोलि कि एसआईटी जु ब्वनि च वा सरकार क भाषा च। उन्न बोलि कि ये मामला मा अबि चार्जशीट भि नीं ह्वै अर यु मामलु उच्च न्यायालय मा च। इन्ना मा कनकैकि संसदीय कार्य मंत्री वीआईपी थैं बचाैंणा छन अर ब्वना छन कि वीआईपी क्वीं न, कमरा थैं ब्वलें जान्द।

ऐ मामला मा प्रमिला रावतन बोलि कि विधानसभा मा अंकिता कतल क मामला उठ्यें ग्यें। उन्न बोलि कि बेटी थैं निसाब दिलौंणा क छ्वीं लगौंण वळि सरकार विधानसभा मा चुप किलै च। उन्न बोलि कि या से सरकार मंसा पता चलणि च।

त वखि चार दिन बटि अनशन मा बैट्ठयां जयेंद्र रमोला, संजय सिलस्वाल, जितेंद्र पाल पाठी, सूरज कुकरेती, यशवंत सिंह रावतन कैबिनेट मंत्री ऐ बयाना क निंदा कायी।