यूकेडी न कायी विधानसभा कूच, अंकिता कु कतल अर यूकेएसएसएससी भर्ति घोटाळा मा सीबीआई जांच करणा क कायी मांग

देरादूण। सिचै विभागा मा भर्ति करयें जाणा क बारा मा अपड़ि मांग थैं लेकैकि यूकेडी न आज विधानसभा कूच कायी।

ऐ मौका फर यूकेडी क कार्यकर्ताओं न सरकार के खिलाफ नाराबाजी कायी।
यूकेडी न अंकिता कु कतल अर यूकेएसएसएससी भर्ति घोटाळा मा सीबीआई जांच क मांग कायी। उन्न बोलि कि पाणि, बोण, जमीन फर अबि भि यखक मनखियों कु अधिकार तय नीं ह्वै साकी। आज हमरि जमीन बंजर प्वड़ि छन।

विधानसभा कूच से पैळि यूकेडी क कार्यकर्ता नेहरू कॉलोनी फव्वारा चौक मस जमा ह्वीं। जैका बाद सब्यौंन विधानसभा खूंणि कूच कायी। जख पुलिसन प्रदर्शनकारियों थैं रिस्पना पुळ से पैळि बैरिकेटिंग लग्यें कि रोकि दे। जख मा नाराज कार्यकर्ताओं अर पुलिस न एक दूसर थैं खुब ढसकै। जैका बाद रुस्यां कार्यकर्ता वखिम सड़कि मा धरना पर बैट्ठिी ग्यीं अर सरकारन खिलाफ नाराबाजी कायी।

यूकेडी क केन्द्रीय मीडिया प्रभारी शिवप्रसाद सेमवालन मुख्यमंत्री से सिचैं विभाग मा 228 पदु मा भर्ति, अंकिता कु कतल, यूकेएसएसएससी, विधानसभा भर्ति घपरोल मा सीबीआई जांच करणा मांग कायी। उन्न बोलि कि चुनौं से पैलि भाजपा बरोजगारु थैं नौकरि देंणा कु अर व्यटुळों से जु वादा कर्या छायीं, चुनौं जीतणा के बाद ठीक यांकु उल्टु करणि च।

बेरोजगार संघ क अध्यक्ष बॉबी पंवारन बोलि कि खाली पदु मा भर्ति कर्यें ज्यां। उन्न बोलि कि राज्य बण्यां 22 साल ह्वैग्यीं पर हमथैं अबि तक वु राज्य नी मिलु जन्न आन्दोलनकारियों कु सुपिनु छायीं।

युवा मोर्चा क केन्द्रीय अध्यक्ष राजेन्द्र सिंह बिष्टान बोलि कि प्रदेस मा पलायन रव्कणा खूंणि राज्य क बीच मा गैरसैंण थैं प्रदेसा क पक्की राजधानी बण्यें जाण चैंद।

यूकेडी क केन्द्रीय उपाध्यक्ष जय प्रकाश उपाध्याय न बोलि कि अंकिता कु कतल अर यूकेएसएसएससी भर्ति घोटाळों क सीबीआई से जांच हूंण चैंद। उन्न बोलि कि सरकार जनता क भावना थैं देखिक काम नीं करणि च अर प्रदेस क मामलु मा लीपापोती करणा मा लग्यीं च।

यूकेडी क विधानसभा कूच, यूकेडी क कार्यकारी अध्यक्ष डॉक्टर शक्ति शैल ,सुनील ध्यानी ,एपी जुयाल, जयप्रकाश उपाध्याय, राजेन्द्र गुसाईं, सुरेंद्र सिंह चौहान, सुरेंद्र कुकरेती, लताफत हुसैन, राजेश्वरी रावत, राजेंद्र बिष्ट, दीपक रावत, महानगर अध्यक्ष विजेंद्र रावत, सविता श्रीवास्तव, सुशीला पटवाल , नीलम लखेरा, संजीव भट्ट, बिपिन रावत, शैलेश गुलेरी देवेंद्र कंडवाल, अतुल बेंजवाल, जितेन्द्र पंवार, टी एस राणा, रवींद्र सेमवाल टीकम राठौर अनिल डोभाल  अर वरुण शर्मा क दगड़ा दगड़ि बौत सर्या यूकेडी क कार्यकर्ता छायीं।