MOU , भ्वां म उतरणा की पूरि योजना त्यार . . .
उत्तराखण्ड ग्लोबल इन्वेस्टर्स समिट म निवेशकु क रिकार्ड करार करणा क बाद अब धामी सरकार क टक ऊतैं भ्वां मा उतरणा क च।
इन्वेस्टर्स कु निवेश तैं भ्वां मा उतरणा खूंणि कदम कदम पर ‘फील गुड’ हूयां या खूंणि नै रणनीति त्यार कर्ये ग्यायी। ये सिस्टम मा मुख्यमंत्री सीधा जुड़यां राला अर क्वीं घपरोल न हूयां या खूंणि मुख्य सचिव तैं हप्ता म एकबार यांकी समीक्षा करणा जिम्मेबरि दिये ग्यायी।
मुख्यमंत्री तरफि बटि 15 फरवरी तक जादा से जादा प्रस्तावु तैं भ्वां म उतरणा कु काम अर लक्ष्य तय कर्यें ग्यायी।
बतै दियां कि 8 व 9 दिसम्बर खूंणि देरादूण म उत्तराखण्ड ग्लोबल इन्वेस्टर्स समिट म कुल 3.56 लाख करोड़ रुप्यौं क 1779 एमओयू सैन ह्वीं। जैमा ऊर्जा क तोक म 1.03 लाख करोड़ा 157 अर उद्योग विभाग से जुड़यां 78 हजार करोड़ क 658 करार सामिल छन। देस अर विदेश क निवेशकु न उत्तराखण्ड मा पैंसा लगौंणा म ज्यूं खोलिकि अपणि इच्छा जतै। यीं कारण च कि निवेश लक्ष्य कु आंकड़ा समिट सुरु हूंण से पैलि 2.5 लाख करोड़ से जादा कु ह्वैग्यें।
मुख्यमंत्री धामी क या बड़ी जीत च अर चौछ्ड़ि ऊंका गुणगान हूंणा छन अर धामी चाणा छन बल धाक इनि रैयां। सबि करार भ्वां म अयां यां खूंणि सिंगल विंडो सिस्टम तैं चटक कर्ये ग्यायी। गुड कॉर्डिनेशन, फास्ट वर्किंग अर गुड विहेवियर कैकि या कोसिस कर्यें जाली अर निवेशकु तैं अपड़ा करार करणा पर क्वीं पछतावा नीं हूयां। निवेश कैकि निवेशकौं की खूब बरगत हूयां अर उत्तराखण्डा बरगत मा बि अपडु योगदान दियां। यनि उमेद से ऊंकी मदत करणा खूंणि मुख्यमंत्री न अफसरू तैं निर्देश दीं।
अबि पिछल दिनु मा प्रदेस सचिवालय म हूयीं बैठक मा मुख्यमंत्री न बोलि छायीं बल निवेश तैं जमीन म उतरणा क हम सब्यौं क जिम्मेबरि च। प्रदेस मा लगण वला उद्योगु से कतगा रुजगार मिललु यां क बारा मा पूरि जाणकारि रख्यां। निवेश क जरिया लग्यां उद्योगु से सीधा ब्यटुलों तैं ज्वड़े ज्यां। महिला स्वयं सहायता समूहों तैं पूरु फैदा मिलयां यांकि पूरि कोसिस हूंण चैंद।
खास कैकि ज्वानु तैं सौर ऊर्जा अर पर्यटन नीति क जरिया जादा से जादा रुजगार दियें ज्यां। धामी कु ध्येय च कि निवेश प्रस्तावु म इकोलॉजी अर इकोनॉमी कु तालमेल क दगड़ ज्वानु तैं जादा से जादा रूजगार मिल्यां।