पहलवानु न अलमटु आंखौं न नरेश टिकैत तैं दे दीं मेडल अर अपणा घौर चलिग्यींन
हरद्वार। कुश्ती संघ क अध्यक्ष अर भाजपा क सांसद बृजभूषण शरण सिंह न खिलाप कारवै क मांग करणा पहलवान अपड़ा मेडल गंगा बुगोण खूंणि हरद्वार पौंच्यां छायीं। अपणि घोषणा क बाद हरद्वारा मा गंगा घाट मा मेडल गंगा मा बगौंण से पैळि पहलवान क आंखौं मा पाणि ब्वगणु छायीं।
ऐ मौका फर गंगा घाट पर मनखियौं क भिवड़ाट छायीं। पहलवान विनेश फोगाट, साक्षी मलिक अर बजरंग पुनिया कुटुम्दरि अर उंक दगड़ मा बौत सर्या मनखि गंगा घाट मा पौंछया छायीं।
या से पैळि पहलवान बजरंग पूनिया, विनेश फोगाट अर साक्षी मलिक न सोशल मीडिया मा एक बयान दे छायीं कि वु अपड़ा मेडल तैं गंगा मा बुगौंण खूंणि हरद्वार जाणा छन। उन्न बोलि कि माँ गंगा तैं पवैत्र मन्यें जान्द अर उतगा हि मेनत न अर पवैत्रता न हमन बि यीं मेडल हासिल करिन।
पहलवानु तैं मनौंणा खूंणि नरेश टिकैट हरद्वार मा पौंछ्या छायीं अर लगातार पहलवानु तैं मनौंणा क कोसिस करणा छायीं। उन्न बोलि कि यीं मेडल देस क धरोहर छन, इल्लै यु मडळु तैं गंगा मा बगौंणु ठीक नीं च। टिकैत न उथैं विंगै (समझाया) कि तुमन यीं मेडल नीं रखण त मेडलु तैं गंगा मा बुगौंणा क जगा सीधा राष्ट्रपति तैं दे द्यावा।
बतै जाणु च यांक बाद पहलवानु न अपणा मेडल नरेश टिकैट तैं दे दीं अर वापिस अपणा घौर चलिग्यींन।