उत्तराखण्ड मा एकदा दुबरा नै जिला बणाणा कु मुद्दा ह्वैग्यें तातु (गरम)
देरादूण। उत्तराखण्ड मा नै जिला बणाणा क मांग बौत पैळि बटि हूंणि च। कांग्रेस या फिर भाजपा द्वीयों न एक बारा मा कभि कुछ नि कै। अब मुख्यमंत्री धामी एकदा दुबरा नै जिला बणाणा पर विचार करणा क बात क्या बोलि प्रदेस मा सियासत सुरू ह्वैग्यें।
मुख्यमंत्री धामी न बोलि बल प्रदेस मा नै जिला बणाणा क मांग बौत पैळि बटि हूंण च यां फर सरकार दुबरा विचार कराली। उन्न बोलि प्रदेस मा नै जिला बणाणा क दरकार च। ऐ बारा मा जननेताओं क दगड़ मा बात कर्यें जाली।
मुख्यमंत्री क ऐ बयान के बाद पैल्यक मुख्यमंत्री हरीश रावत न झट बोलि प्रदेस मा हूयां भर्ति घोटाळों न भाजपा सरकार क जलड़ा हिलग्यीं, जै कारण ध्यान भटकौणा खूंणि नै जिला कॉमन सिविल कोड अर भू-कानून जन शिगूफा छ्वडे़ ग्यें। भाजपा कु मकसद भर्ति घोटाळों अर औरि घोटाळों से ध्यान हटौंणा कु च।
हरीश रावतन बोलि अगर मुख्यमंत्री इन स्वचणा छन त ऊंकु स्वागत च। उन्न बोलि बल हमन या पर काम कर्यूं च पर हम नि कैरि साका, अब नि कै साका त नि कै साका। उन्न बोलि जू निसाणु साधि ग्यें वु सिकन्दर। उन्न मुख्यमंत्री खूंणि बोलि आप निसाणा लग्यें द्यावा व हम ब्वळला आप सिकन्दर छा। अर हम सिकन्दर थैं ब्वळला कि आप जिला क दगड़ मा द्वी या तीन कमिश्नरि थैं भि बणैं द्यावा।