बौत जल्दी पूरु ह्वै जालु यूनिफॉर्म सिविल कोड कु संकल्प : धामी
देरादूण। मुख्यमंत्री पुष्कर सिंह धामी न एकदा दुबरा प्रदेस मा यूनिफॉर्म सिविल कोड लागू करणा क अपड़ि बात बोलि। ऐ बारा मा उन्न बोलि यां फर बौत तेजी से काम हूंण च अर प्रदेस मा बौत जल्दी यूनिफॉर्म सिविल कोड लागू ह्वै जालु।
मुख्यमंत्री धामीन बोलि बल यूनिफॉर्म सिविल कोड ऊंकु चुनौं कु मामलु नि छायीं, प्रदेस अर राज्य क जनतै क भलै खूंणि म्यारू संकल्प च। उन्न बोलि बल समान नागरिक संहिता कानून कु ड्राफ्ट तयार करणा खूंणि हमरि सरकारन ज्वां समिति बण्यें छायीं वा ड्राफ्ट तयार करणा मा लग्यीं च। समिति जन्नि ड्राफ्ट तयार कैरिकि सरकार थैं देलि उन्नि सरकार वैधानिक करवै कराली।
उन्न बोलि कि अंतरराष्ट्रीय केर से जुड्या उत्तराखण्ड क सुरक्षा खूंणि समान नागरिक संहिता जरूरी च।
समान नागरिक संहिता क ड्राफ्ट तयार करणा खूंणि बणि समिति क अबि तक द्वी बैठक ह्वैग्यीं अर मुख्यमंत्री धामी समिति कु काम लगातार दय्यखणा छन। बतै दियां बल यूनिफॉर्म सिविल कोड लागू ह्वै जांदा त उत्तराखण्ड देस कु पैळु राज्य ह्वै जालु जख समान नागरिक संहिता लागू ह्वैली।