यूकेडी न कायी अळग स्वास्थ्य मंत्रीक मांग

उत्तराखण्ड क्रांन्ति दळन प्रदेश क मुखिया तीरथ सिंह रावत से प्रदेश मा अळग स्वास्थ्य मंत्री बणौंण क मांग कायी। यूकेडी न ब्वाळ कि अगर प्रदेश थैं कोरोना वायरसक हाहाकार से बचौंणच त प्रदेश मा एक मंत्री थैं अळग से स्वास्थ्य विभाग क जिमेबारी देंण प्वड़ळी।

उत्तराखण्ड क्रांति दळ के केन्द्रीय मीडिया प्रभारी शिव प्रसाद सेमवाळ न ब्वाळ कि पिछळ साळ कोविड-19 से भि उत्तराखण्ड सरकारन सबक नि ळें। उन्न ब्वाळ कि पिछळा साळ कोविड सेन्टरों खूंणि मंगया मरीजु का खटु़ळा (बेड) अर वेंटिळटर धूळ खाणा छन। त आईसीयू बणौंणा क काम अद्या प्वडणा छन।

शिव प्रसाद सेमवाळन रेमडिसीवर दैव क काळा बाजारी खूंणि भाजपा थैं जिमेबार बतै अर ब्वाळ कि काळाबाजारी थैं रोकणा खूंणि अर दवै क मांग पूरी करणा मा भाजपा सरकार जरा भी जिमबारी से काम नि करणी च। उन्न ब्वाळ कि सरकार देरादूण, ऋषिकेश मा कर्फ्यू का बाद भी कुम्भ न्येंणों कार्यक्रम उर्याणी च। जै कारण से हरिद्वार मा कोरोना संक्रमण बढ़ ग्यायी । यूकेडी न सरकार से मांग कायी कि कोरोना क दूसर ळहर से निपटणा खूंणि एक कैबिनेट मंत्री थैं स्वास्थ्य मंत्राळय कु जिमा दियें जावा।

उत्तराखण्ड क्रांन्ति दळ क शांति प्रसाद भट्टन न प्रदेश क मंत्री हरक सिंह रावत क भाणजु थैं अस्पताळ मा खटुळु न मिलण पर सरकार थैं लताड़ लगैं। उन्न सरकार पर कोरोना का आंकड़ा छुपाणाें अर कम जांच करणा क आरोप भि लग्यें।

प्रेस वार्ता मा लताफत हुसैन, राजेन्द्र प्रधान मौजुद छायी।