मूल निवास अर भू-कानून म मांग, हल्द्वानी मा ह्वे महारैली
हल्द्वानी। उत्तराखण्ड म मूल निवास कानून लागू करणा मांग अर वैंकि कट ऑफ डेट 26 जनवरी 1950 करणा मांग अर प्रदेस मा कटकुट भू-कानून बणौंणा मांग तैं लेकैकि हल्द्वानी मा महारैल निकलें ग्यायी।
आज भू-कानून समन्वय संघर्ष समिति क उर्यीं महारैली म सामाजिक अर राजनीतिक संगठनु क लोगुन समर्थन द्यायी।
प्रदर्शनकारियों न बोलि कि उत्तराखण्ड प्रदेस बणणा बाद यखक लोगुक क्वीं फैदा नीं ह्वे अर उल्टु प्रदेसा रैवासियों तैं नुकसान ह्वे। आज वुथैं अपड़ा घौर म हि नौकरि खूणि तरसण प्वाड़णु च। पाणि, बोण हमरा छन पर वैं पर भैर लोगु क कब्जा च।
प्रदर्शनकारियों न बोलि हिमाचल प्रदेसा जनु प्रदेसा म कुटकुटु भू-कानून लागू कर्यें ज्यां।
उत्तराखण्ड मा भू-कानून अर मूल निवास मांग हूंणि च। प्रदेसा मा मूल निवास कानून लागू करण अर वैंकि कट ऑफ डेट 26 जनवरी 1950 घोषित करणा मांग तैं लोगु क खूब दगुड़ मिलणु च।