एम. बी. फूड्सा कु फूड प्रोसेसिंग अर पैकेजिंग प्लाट थैं मुख्यमंत्री न कायी सुरु
देरादूण। मुख्यमंत्री धामीन आज छंचर खूंणि हरद्वार बुग्गावाला मा एम.बी. फूड्स कु लग्यूं फूड प्रोसेसिंग अर पैकेजिंग प्लाट थैं सुरु कायी।
ऐ मौका फर मुख्यमंत्री फल सब्जी अर मशरूमा क प्रोसेसिंग अर पैकेजिंग प्लाट थैं भि देखि। मुख्यमंत्री न बोलि मनखि थैं अपड़ि जिन्दगि मा विकल्प रहित संकल्प कु मंत्र लिंण चैंद अर अपड़ि सुपिनों थैं पूरू करण चैंद।
मुख्यमंत्री न बोलि बल बुग्गावाला मा 14 एकड़ मा पॉली हाउस क बणाण से यख रोजगार अर औरि काम धंधों भि सुरु ह्वै जाला। उन्न बोलि यू प्लाट लगण से यखक मनखियों थैं रोजगार मिल्लूं अर तोक थैं नै पछ्याण।
मुख्यमंत्री न बोलि सरकार सबि जिलों मा एक उत्पाद जन्न हरद्वार मा मशरूम अल्मोड़ा मा खुबानी, बागेश्वर मा कीवी, चम्पावत मा तेजपत्ता अर मसाळा, चमोली मा माछा, देरादूण मा बेकरी, नैनीताल मा आडू, पौड़ी मा माल्टा रुद्रप्रयाग मा चौलाई, टिहरी मा आदू, उत्तरकाशी मा सेब, ऊधमसिंह नगर मा आम अर पिथौरागढ़ मा हल्दू कु चयन कैकि उत्पादन बणौंण कु काम करणि च। ईं योजना मा प्रदेस मा खाद्य प्रसंस्करण ईकाई मा 49 लाभार्थियों थैं करजा दियें ग्यें।
मुख्यमंत्री न बोलि बल उत्तराखण्ड मा खेती बाड़ी क बौत संभावना छन।
मुख्यमंत्री न बोलि आण वळु बगत मा हम मुख्यमंत्री मशरूम विकास योजना थैं सुरु करणा छा। जै से 25 हजार लोगु थैं रोजगार मिल्लूं।
ऐ मौका पर कैबिनेट मंत्री गणेश जोशी, कैबिनेट मंत्री सुबोध उनियाल, सांसद डॉ. रमेश पोखरियाल निशंक, विधायक सविता कपूर, विधायक मुन्ना सिंह चौहान, विधायक प्रदीप बत्रा, विधायक रवि बहादुर, जिला पंचायत अध्यक्ष देहरादून मधु चौहान अर औरि मनखि छायीं।