केदारनाथ मंदिर गर्भगृह फोटु वायरल हूंण पर पुरोहित छन टरठरू हूंया, त अजेंन्द्र अजय न बोलि ऊथैं अध्यक्ष पद बटि हटौंणा क चाल
रुद्रप्रयाग। केदारनाथ मंदिर क गर्भगृह मा बटि फोटु खीचिंक वायरल करणा क मामला मा बदरीनाथ केदारनाथ मंदिर समिति क तीर्थ पुरोहित ठरठरू (नाराज) ह्यां छन अर मंदिर समिति क अध्यक्ष अजेंद्र अजय क खिलाफ रुस्यां मा छन। तीर्थ पुरोहितु न मंदिर समिति क अध्यक्ष अजेंन्द्र अजय पर आरोप लगे कि बोलि कि मंदिर समिति क अध्यक्ष न मंदिर मा बिना कै थैं पुच्छा सुन्ना क प्लेट चढ़ैं अर अब गर्भगृह क भितराक फोटु खींचिक अफि प्रचार करणा छन।
तीर्थ पुरोहितों न बोलि कि मंदिर क भितर फोटु खींचिक वायरल करणा क कारण हमरि आस्था थैं ठीस पौंचि। पुरोहितों न बोलि कि मंदिर समिति क अध्यक्ष अजेंन्द्र अजय क खिलाफ पुलिस मा शिकैत कर्ये जाली, उन्न बोलि कि अजेंद्र अजय थैं अध्यक्ष पद बटि हटौंणा क मांग भि सरकार से करें जाली।
केदार सभा क अध्यक्ष न विनोद शुक्ला अर तीर्थ पुरोहित आचार्य संतोष त्रिवेदी न मंदिर समिति पर आरोप लग्यें अर बोलि कि पैळि त मंदिर समिति क अध्यक्ष न बिना तीर्थ पुरोहितों थैं बत्यां, भैर बटि ताळु लगें कि गर्भगृह मा सुन्ना क प्लेट लगे अर अब सुन्नाक प्लेट लग्यां गर्भगृह क फोटु थैं वायरल करें जाणु च।
तीर्थ पुरोहितों न बोलि कि इन्न लगणु च कि भगवान क चमक से जादा सुन्ना क चमक ह्वैग्यें। उन्न बोलि बल मंदिर समिति क अध्यक्षन तीर्थ धाम थैं पर्यटन क जगा बणें दे।
जैका बाद आज अजेन्द्र अजय न अपडि सफै दे अर बोलि कि कुछ लोगुन ऊथैं मंदिर समिति क पद बटि हटाण खूंणि सुपारि दे याली। उन्न बोलि कि मंदिर समिति मा कुछ कर्मचारी, जु ऊंका खिलाफ छन, या उंकी साजिस। उन्न बोलि कि उन्न कुछ कर्मचारियों क इंना-उंना (तबादला) कै छायीं। इन्न मा ऊथैं अध्यक्ष पद बटि हटाणा के सुपारी दिएग्यें।
बतै दिंया कि केदानाथ मंदिरा क गर्भगृह मा फोटु नि खींचि सकदन जबकि सोशल मीडिया मा एक फोटु वायरल हूंणि च जैमा केदार बाबा के गर्भगृह मा बदरीनाथ-केदारनाथ मंदिर समिति के अध्यक्ष अजेंन्द्र अजय खड़ा छन। जैका बाद केदारनाथा क तीर्थ पुरोहित ठरठरा छन। अर बनि-बनि क सवाल खड़ा करणा छन।
केदानाथ मंदिर क गर्भगृह मा एक दानादाता न सुन्ना क प्लेट लगौंणा क इच्छा कै छायीं। जैका बाद बीकेटीसी क मंजूरी दे अर केदारनाथ मंदिर क गर्भगृह क पाळ (दीवार) पर सुन्ना क प्लेट लग्यें ग्यें छै।