जोशीमठ मा आपदा प्रभावित तोक खूंणि राहत समानै गाड़ी थैं मुख्यमंत्री न दिखें झण्डा
देरादूण। मुख्यमंत्री धामी न आज मुख्यमंत्री कैम्प कार्यालय मा एचडीएफसी बैंक कु सीआरसी कार्यक्रम क जरिया जोशीमठ आपदा प्रभावित तोक खूंणि दियें ग्यें राहत समानै गाड़ी थैं हारु झण्डा दिख्यें कि जोशीमठ भेजि।
मुख्यमंत्री न एचडीएफसी बैंक अर मानव सेवा समाज संस्था कु अभार बोलि अर बोलि कि जोशीमठ मा प्रभावितौं थैं दुबरा बस्यें जाणा कु अर सर्यां बन्दबस्त सै तरीकन होन या खूंणि सरकार काम करणि च। उन्न बोलि कि सरकारै मदत खूंणि संस्थाएं अगनै आणि छ।
मुख्यमंत्री न बोलि प्रधानमंत्री न जोशीमठ प्रभावित तोक क समीक्षा कायी अर केन्द्र सरकार क तरफा बटि प्रदेस थैं मदत करण कु भरोसु दे।
मुख्यमंत्री न बोलि कि ऐसु क बजट मा जोशीमठ प्रभावित तोक खूंणि एक हजार करोड़ रुप्यौं कु बजट क बन्दबस्त कर्यूं च।
ऐ मौका फर एचडीएफसी बैंका सर्कल हेड बकुल सिक्का, गौरव जैन, विवेक ग्रोवर, मानव सेवा समाज संस्था बटि आशीष गिरी, जितेंद्र मुदलियार, श्याम सुंदर अर सुश्री उमा छायीं।