व्यय पर्यवेक्षक नामांकन मा प्रत्याशियों अर पार्टियों कु खरचा पर रखला नजर

देरादूण। संयुक्त मुख्य निर्वाचन अधिकारी श्रीमती नमामि बंसल न सचिवालय मा ब्रीफिंग कायी अर बोलि कि पंच्या लोकसभा सीटु खूणि व्यय पर्यवेक्षक उत्तराखण्ड पौंछिग्येन। सुक्वार खूणि हूंण वला नामांकन मा वु प्रत्याशी अर पार्टियों कु खरचा पर तैं दय्खला।

श्रीमती नमामि बंसल न बतै कि लोकसभा निर्वाचन मा शराब कु गलत इस्तमाल तैं रवक्णा खूणि रोज कारवै कर्ये जाली। उन्न बोलि कि 20 मार्च खूणि नैनीताला मुक्तेश्वर थाना मा 450 लीटर शराब अर चंपावत मा 600 लीटर शराब पकड़े ग्यायी। उन्न बोलि कि शराब कु गलत इस्ममाल खूणि 497 फ्लाइंग स्क्वाड बण्यें ग्यीन। प्रदेस मा शराबा बंटणा की 628 जगों क अलावा 8 बॉटलिंग प्लांट अर डिस्टिलरी पर सीसीटीवी क नजर च अर शराब बंटण वलि सबि गाड़ियों पर जीपीएस लग्यां छन।

उन्न बोलि कि प्रदेसा मा 12 पी-थ्री बूथ (जौ बूथू पर तीन दिन पैलि पोलिंग पार्टी जान्द) जैमा उत्तरकाशी क 11 अर एक बूथ कनार, धारचूला पिथौरागढ़ मा च। यु बूथ 10 किलोमीटरा दूर अर कुल 586 मतदाता छन। उत्तरकाशी क लिवाड़ी क दूरी 20 किलोमीटर च जख 577 मतदाता छन।