सड़क बणौंणा मा नी हूंण चैंद विस्फोटा कु इस्तमाळ
देरादूण। पाड़ मा सड़क्यिों तैं बणौंणा दा विस्फोट कु इस्तमाल नीं हूंण चैंद अर नै तकनीक कु इस्तमाल हूंण चैंद। या बात सतपाल महाराजन यमुना कालोनी मा लोक निर्माण विभागा क समीक्षा बैठक मा बोलि।
सतपाल महाराजन विभागा सबि अधिकारियौं अर जिलाधिकारियों तैं निर्देश दीं कि जख बि सड़क भ्वां मा घसणि च अर माटु अपड़ि जगा बटि ठसकणु (भूस्खलन) च वैकीं शिकैत मिलण पर वैंथैं रवक्णा दगड़ा-दगड़ि बगत-बगत क रिपोर्ट सरकार तैं दियें जाण चैंद।
महाराजन बोलि कि आपदा मा टुट्यां पुळु, वाटों तैं ठीक करणा कु काम झटाझट कर्यें ज्यां।
बैठक मा जोशीमठ मा भ्वां मा घसणि जमीन, मारवाडी अर हेलंग बाईपास क बारा मा उन्न बोलि कि चारधाम जातरा मा जतगा भि बाईपास छन उथैं फटाफट ठीक कर्यें ज्यां।
समीक्षा बैठक मा लोक निर्माण मंत्री महाराजन अधिकारियौं तैं पाड़ि जनपदु मा सड़क्यिों क देखरेख करणा अर बन्द बाटौं तैं ख्वलणा क बारा मा बोलि कि बेलदारु अर विभाग मा खाळी प्वड़यां पदु मा भर्ति कर्यें ज्या।
बैठक मा लोक निर्माण विभागा प्रमुख सचिव आरके सुधांशु, अपर सचिव विनीत कुमार, प्रमुख अभियंता अयाज अहमद, मुख्य अभियन्ता, अधिशासी अभियंतौं क दगड़ मा अपर सचिव, आपदा अर सबि जनपदु क जिलाधिकारी विभागीय अधिकारियौं न वर्चुअल माध्यम न भाग ल्यें।