औणी गाैं तैं सर्या दुन्या मा नै पछ्याण मिललि : सुबोध उनियाल
जी-20 देसु क प्रतिनिधियौं न आज उत्तराखण्डा क टिरी जिला क आदर्श गौं औंणी मा घुमघाम कायी अर भारता क गौ मा रैंण वळों क बन्दबस्त तैं देय्खि।
औंणी गौं मा सांस्कृतिक कार्यक्रमु क झरफर छायीं। गौं वळों भैर देस बटि अयां न्यूतेरु कु स्वागत कायी।
वन मंत्री सुबोध उनियाल अर गाैं वळों न भैर देस बटि अयां न्यूतेरु तैं गौं कु विकास अर गौं की संस्कृति क बारा मा बतै।
नरेन्द्र नगर मा औंणी गाैं मा पौंच्यां न्यूतेरु न आंगनबाड़ी केन्द्र, नरेंद्र नगर फारेस्ट क इंटरप्रिंटेशन सेंटर, पंचायत भवन, बर्तन बैंक, ग्रामीण बचत बैंक, प्राथमिक स्कुळ, दुग्ध उत्पादन केंद्र, पॉली हाउस अर मिलेट सेंटर मा बि घुमघाम कायी।
औंणी गौं मा गाैं क बैठक मा विदेशी न्येतरू न केन्द्र अर प्रदेस सरकार क ग्रामीण विकास खूंणि क चलण वला कामु की जाणकारि ल्यायी। उन्न उत्तराखण्ड लोक संस्कृति, पछ्याण लोक कला, खेती-पाति क बढ़ै कायी। गौं मा भैर देसा बटि अयां न्येतरु तैं खाण मा पाड़ कु खाणु दियें ग्यें।
वन मंत्री सुबोध उनियाल न बोलि कि भैर देस बटि अयां मैमानु क औंणी गौं मा आण से औणी गाैं तैं सर्या दुन्या मा नै पछ्याण मिललि।