चम्पावत तैं आदर्श जिला बणौंणा खूंणि हम खळाखळ काम करणा छा: मुख्यमंत्री धामी।

मुख्यमंत्री धामीन न आज टनकपुर मा 5590.70 करोड़ रूप्यौं से बणण वलु रोजवेज बस टर्मिनल डिपो वर्कशॉप अर रीजनल वर्कशॉप बिल्डिंग कु भूमि पूजन कायी। ऐ मौका फर मुख्यमंत्री न प्रधानमंत्री क मन की बात बि सूंणि।

ऐ मौका पर मुख्यमंत्री धामी न विकासा कामु क घोषणा बि कायी। उन्न बोलि कि सीएसआर फंड से टनकपुर अर बनबसा क सैरी तोक म फ्री वाई-फाई लग्यें जालु। मुख्यमंत्री धामीन बोलि कि टनकपुर बटि देरादूण खूंणि वोल्वो बस चलयें जाली। यांका अलाव उन्न बोलि कि टनकपुर म 132 केवी कु बिजली बस स्टेशन बण्यें जालु।

ऐ मौका पर मुख्यमंत्री न राष्ट्रीय ग्रामीण आजीविका मिशना जरिय स्वयं सहायता समूह तैं चेक बि दीं।

मुख्यमंत्री धामी न बोलि कि पर्यटन तैं अगनै बढ़ौंणा खूंणि हमतैं नै बस अड्डौं बणौंणा कु काम तैं बढ़ावा देंण प्वाड़लु, तबि भैर बटि औंण वला पर्यटक अर जातरी क जातरा सजलि ह्वैली। उन्न बोलि टनकपुर बस अड्डा तैं उत्तराखण्ड कु एक मॉडल बस अड्डा बण्यें जालु।
मुख्यमंत्री न बोलि मां पूर्णागिरी कु कौथिग सर्या साल चल्यां यां खूंणि प्रदेस सरकार पूरि कोसिस करणि च। मुख्यमंत्री न बोलि चम्पावत तैं आदर्श जिला बणौंणा खूंणि हम खळाखळ काम करणा छौ। उन्न बोलि प्रदेसा विकास खूंणि कटकुटा फैसला लिंण प्वाड़ला, त हम ल्यौळा।

ऐ मौका पर सांसद अजय टम्टा, भाजपा प्रदेश मंत्री विकास शर्मा, हेमा जोशी, नगर पालिका अध्यक्ष टनकपुर विपिन कुमार, बनबसा रेनू अग्रवाल, जिला महामंत्री भाजपा मुकेश कलखुडिया, पूरन मेहरा, मंडल अध्यक्ष भाजपा तुलसी कुंवर, अर लोग छायीं।