केन्द्रीय मंत्री राजनाथ सिंग न 35 इंफ्रास्ट्रक्चर परियोजनाऔं कु उद्घाटन कायी

देरादूण। केन्द्रीय मंत्री राजनाथ सिंग न आज मुख्यमंत्री धामी क दगड़ि सीमांत तोक जोशीमठ ढाक बिटि बीआरओ कु 670 करोड़ रुप्यौं से बण्यीं 35 इंफ्रास्ट्रक्चर परियोजनाऔं कु उद्घाटन कायी। जैमा सात प्रदेसु क 6 सड़क अर 29 पुल सामिल छन। रक्षा मंत्री न जौ परियोजना कु उद्घाटन कायी वैमा उत्तराखण्ड म भारत चीन सीमा तैं ज्वड़णा खूणि जोशीमठ-मलारी मा ढाक पुल, भापकुण्ड पुल अर समुना- रिमखिम मोटर मार्ग मा रिमखिम गाढ पुल सामिल च।

मुख्यमंत्री न रक्षा मंत्री कु स्वागत कायी अर सीमांत तोक क विकास परियोजनाओं क लोकार्पण पर आभार बोलि। मुख्यमंत्री न बोलि कि प्रधानमंत्री क मार्गदर्शन मा उत्तराखण्ड बौत तेजी से अगनै बढ़दै जाणु च। मुख्यमंत्री न बोलि कि प्रधानमंत्री मोदी जी धार्मिक अर पर्यावरणीय महत्व तैं समझि अर बड़ी परियोजनाओं पर काम सुरू कायी।

रक्षा मंत्री न बोलि कि देसा सीमा क रक्षा खूणि हम सबि मिलकैकि काम करणा छौ, यामा हमतैं सब्यौं कु दगडु मिलणु च। रक्षा मंत्री न बीआरओ गुणणान कैकि बोलि कि क्वीं बि परियोजना बगत मा पूरी बीआरओ क मेनत अर लगन से हि ह्वे सकदि। उन्न बोलि कि हमरि सरकार सीमावर्ती तोक तैं मुख्यधारा कु भाग मनदि, एक बगत छायीं जब सीमा कु विकास तैं क्वीं महत्व नीं दियें जान्द छायीं। आज सोच बदलि ग्ये। उन्न बोलि हमरि सरकार सीमावर्ती तोका विकास खूणि सदनि त्यार च।

ऐ मौका पर पैल्यक मुख्यमंत्री अर सांसद तीरथ सिंह रावत, भाजपा प्रदेश अध्यक्ष महेन्द्र भट्ट, कर्णप्रयाग विधायक अनिल नौटियाल, थराली विधायक भूपाल राम टम्टा, जिला अध्यक्ष रमेश मैखुरी, बीकेटीसी उपाध्यक्ष किशोर पंवार बि छायीं।