यूकेडी न कायी हाईकोर्ट थैं हल्द्वानी लिजाणा कु विरोध, बोलि गैरसैंण मा हूंण चैंद हाईकोर्ट
देरादूण। उत्तराखण्ड क्रान्ति दलन हाईकोर्ट थैं नैनीताल बटि हल्द्वानी लिजाणा क सरकारि फैसळा कु विरोध कायी।
यूकेडी क केंन्द्रीय अध्यक्ष काशीसिंह ऐरी न बोलि कि नैनीताल बटि हाईकोर्ट थैं लिजाणा से साफ च कि सरकारक मंसा पाड़ विरोधि च। उन्न बोलि नैनीताल बटि हाईकोट थैं लिजाणा मंसा उन्न च जन्नि सरकार राजधानी थैं गैरसैंण लिजाणा कु विरोध करणि रैंद।
काशी सिंह ऐरीन बोलि कि राजधानी कु मामला मा देरादूण अर गैरसैंण कै कै की सरकार न झंगज्याट कर्यूं च अर अब वीं मंसा न हाईकोर्ट थैं नैनीताल बटि हल्द्वानी लिज्यें जाणा क बात हूंणि च।
काशी सिंह ऐरी न बोलि कि या बात सम्झम नीं आणि च कि हाईकोर्ट क नैनीताल मा हूंणि से कै थैं दिक्कत हूंणि च। उन्न बोलि कि नैनीताल मा हाईकोर्ट हूंणि सै कै थैं भि दिक्कत च त सरकार थैं चैंद की हाईकोर्ट थैं गैरसैंण लिज्यें ज्यां।
काशी सिंह ऐरी न बोलि कि हाईकोर्ट थैं गैरसैंण मा लिजाणु सै च। उन्न बोलि कि अब यूकेडी यां खूंणि अगनै लड़ैं लाड़लि।