प्राइवेट स्कुळु क लूट, यूकेडी न मुख्यमंत्री थैं दे ज्ञापन

देरादूण। उत्तराखण्ड क्रान्ति दलन आज जिलाधिकारी कार्यालय मा प्राइवेट स्कुळौं क लुट खिलाप प्रदर्शन कायी अर जिलाधिकारी क जरिया मुख्यमंत्री थैं ज्ञापन भेजि।

यूकेडी क केन्द्रीय मीडिया प्रभारी शिवप्रसाद सेमवालन मुख्यमंत्री से मांग कायी कि प्राइवेट स्कुळ मैंगि किताब मूल्यौंणा खूंणि मजबूर करणा छन उ फर कारवै कर्यें ज्यां। उन्न अपड़ि नराजगी जतै अर बोलि कि देरादूण मा हिल्टन स्कुळन फीस नी भ्वरण फर एक नौनी थैं तीन घंटा तक स्कूल मा बन्द कैकि सजा दे।

यूकेडी क केन्द्रीय श्रमिक प्रकोष्ठ अध्यक्ष न बोलि कि स्कूल नै किताब मूल्यौंणा खूंणि हर साल पाठ्यक्रम थैं बदलि कै दिन्दन। एक बच्चा क किताब 10 से 12 हजार रुप्यौं क आणि च।

केन्द्रीय प्रवक्ता शांति प्रसाद भट्टन बोलि कि स्कूळ अपड़ि मरजी न पाठ्यक्रम थैं बदलि दिन्दन अर मैंगि-मैंगि किताब मूल्यौंणा कु ब्वे-बुबा फर दबाव बणौंदन। यूकेडी क जिला प्रवक्ता निशीथ मनराल न सरकार से विनति कायी कि स्कुळु मा पढ़ै खूंणि किताब, स्कुळा वर्दी अर फीस खूंणि रेगुलेशन एक्ट बण्यें ज्यां। उन्न बोलि कि सरकार यीं बाति फर झट फैसळा कर्यां नथर यूकेडी थैं आंदोलन खूंणि मजबूर हूंण प्वाड़ळु।

जिलाधिकारी कार्यालय मा ज्ञापन देंण वळों मा उत्तराखंड क्रांति दल क केंद्रीय प्रवक्ता शांति प्रसाद भट्ट लतापथ हुसैन, सुलोचना ईष्टवाल, राजेंद्र पंत, निशीथ मनराल, मंजू रावत, सुलोचना ईष्टवाल, इसलाम, गौरव तिवारी छायीं।