खुलि ग्यींन माँ गंगोत्री अर माँ यमुनोत्री क धामा क् द्वार
उत्तरकाशी। मां गंगोत्री अर मां यमुनोत्री क धामा के पाट आज अक्षय तृतीय क मौका फर दर्शन खूंणि खुलि ग्यींन।
द्विया धामु मा आज पैळि पूजा प्रधानमंत्री क नौ पर कर्यें ग्यें। माँ गंगोत्री धाम क् द्वार दिनम 12 बजिक 35 मिनट फर अर माँ यमुनोत्री क द्वार 12 बजिक 41 मिनट पर खुलिन।
ऐ मौका फर चारधाम मा औंण वळा जातरियों कु देवभूमि औंण फर स्वागत कर्यें ग्यें अर उ फर हैलीकाप्टर न फुळु क बरखा बि कर्यें ग्यें। मुख्यमंत्री धामीन पाट खुलण से पैळि खरसाली मा पूजा कायी।
वैका बाद माँ यमुना कु उत्सव ड्वाळा शनि देव क दगड़ खरसाली बटि यमुनोत्री खूंणि पैटि। मुख्यमंत्री न गंगोत्री धाम मा पूजा कायी अर माँं गंगा कु आशीर्वाद ल्यायी।
मुख्यमंत्री न बोलि कि आज माँ यमुनोत्री अर माँ गंगोत्री धाम क पाट खुलण क दगड़ उत्तराखण्ड क चारधाम जातरा सुरु ह्वैग्यें। उन्न देस विदेस बटि आण वळा जातरियौं कु देवभूमि उत्तराखण्ड मा स्वागत कायी।
मुख्यमंत्री न बोलि कि भगवान बदरी विशाल, बाबा केदार, माँं यमुनोत्री अर माँ गंगोत्री क कृपा सब्यौं पर बणि रैय्यां।
मुख्यमंत्री न बोलि कि चारधाम जातरा मा जातरियौं तैं क्वीं दिकदरि नी हूंण चैंद, सरकार जातरियौं कु सबि सुविधौं कु ख्याल रखणि क पूरि कोसिस करणि च।
ऐ मौका फर गंगोत्री मंदिर समिति क् अध्यक्ष हरीश सेमवाल, यमुनोत्री मंदिर समिति सचिव सुरेश उनियाल, विधायक सुरेश चौहान, जिलाधिकारी अभिषेक रुहेला, एसपी अपर्ण यदुवंशी, जिलाध्यक्ष बीजेपी सतेंद्र सिंह राणा सहित मंदिर समिति क् पदाधिकारी, श्रद्धालु छायी।