खुलि ग्यींन बाबा केदार क् द्वार, मुख्यमंत्रीन कायी देस अर प्रदेस क जस अर राजि-खुसी क कामना
केदारनाथ। भगवान केदारनाथ क द्वार आज सुबेर 6 बजिक 20 मिनट मा श्रद्धाळुऔं खूंणि खुलि ग्यींन। ऐ मौका फर हेलिकॉप्टर बटि जातरियों पर फुळु क बरखा बि कर्यें ग्यें।
आज सुबेर पांच बजि बटि कपाट खुलणा कु काम सुरु ह्वै। धार्मिक परम्परा क दगड़ मा बाबा केदार क पंचमुखी भोग मूर्ति चल उत्सव विग्रह डोळि मा बैट्ठिक रावल निवास बटि मंदिर मा पौंचि। जैका बाद रावल अर श्री बदरीनाथ मंदिर समिति के पदाधिकारियौं न प्रशासना समणि मंदिर क पाट ख्वलिन। कपाट खुलदा हि सर्या धाम मा महादेव क जयकारा लगण बैट्ठि ग्यीं। यांका बाद मुख्य पुजारी न गर्भ गृह मा भगवान केदारनाथ क खास पूजा कायी। जैका बाद भगवान क पाट दर्शन खूंणि ख्वलें ग्यींन।
मुख्यमंत्री क निर्देश फर बाबा क भक्तु फर हेलीकॉप्टर न फुळु क बरखा कर्यें ग्यें। केदारनाथ मा बाबा क पाट खुलण पर मुख्यमंत्री धामी न केदारनाथ मा पूजा कायी अर देस, प्रदेसा जस अर राजि-खुसी क कामना कायी।
मुख्यमंत्री न बाबा क घाम मा अयां जातरियौं कु स्वागत बि कायी अर मंदिर मा हूंण वळु भण्डारा मा बि भाग ल्यायी।
मुख्यमंत्री न बोलि कि उत्तराखण्ड मा चारधाम जातरा थैं सजिळु बणौंणा खूंणि सबि तरौं क कोसिस कर्यें ग्यायी। उन्न बोलि कि समाजिक संगठन, स्वयं सेवी संस्था कु हमथैं जातरा मा पूरि मदत मिलणि च।
मुख्यमंत्री न बाबा धाम मा औंण वळा जातरियौं से विनति कायी कि मौसम क बारा मा जाणकारी लेकैकि बाबा क दर्शन खूंणि अयां।
ऐ मौका फर श्री बद्रीनाथ केदारनाथ मंदिर समिति क अध्यक्ष अजेन्द्र अजय, विधायक केदारनाथ शैला रानी रावत, जिला पंचायत अध्यक्ष अमरदेई शाह , जिला अध्यक्ष भाजपा सिंह महावीर पंवार, जिलाधिकारी मयूर दीक्षित, पुलिस अधीक्षक विशाखा अशोक भदाणे अर बाबा क भक्त जन छायी।