देहरादूण आणी शताब्दी रेळ मा ळगी आग

देरादूण। नै दिल्ळी बटि देरादूण आणी शताब्दी एक्सप्रेस संख्या 02017 मा आज आग ळग ग्यायी। जंगळ म लगी आग मा एक कोच पूरी तरौं जैळी ग्यायी। रेळगाड़ी चाळक अर गार्ड क समझदारी क कारण कोच मा सवार सबि जातरियों थैं सै सलामत कोच बटि भैर निकाले ग्यायी।

ईं कोच मा मध्यप्रदेश बटि ज्वान (युवा) तीरंदाज अर ऊंका कोच यात्रा करणा छायी।

भारतीय तीरंदाजी संघ क वरिष्ठ प्रशासक वीरेन्द्र सचदेवा न बतै कि तीरंदाज देरादूण मा चलणि राष्ट्रीय चैम्पियनशीप मा भाग लिंणा खूणि जाणा छायी। उन्न बतै कि सबि तीरंदाज ठीक छन अर सकुशळ देरादूण पौंचि ग्यी। उन्न बतै कि सबि खिलाड़ियों का घौर मा ऊंकी बात करै द्यायी। सचदेवा न बतै रेलवे क समझदारी से सबि तीरंदाज अर औरि जात्रा करण वळा ळोगु थैं दूसर कोच मा बैट्ठे कि देरादूण पौंचें द्यायाी। सचदेवा न बतै कि तीरंदाजों का सबि ळत्ता कपड़ा अर खेळणा कु सामान जैळि ग्यायी। उन्न ब्वाळ कि देरादूण पौंचणा का बाद हमन सबि खिलाड़ियों खूणि नैं कपड़ांे का व्यवस्था करै द्यायी। उन्न बतै कि तीरंदाजी संघ का अध्यक्ष अर्जुन मुंडा न ब्वाळ कि तीरंदाजों खूंणि खेळणा क समान क व्यवस्था भि राति ह्वै जाळी, भोळ हूंण वळी प्रतियोगिता मा खिलाडी जरूर भाग ल्याळा।