शहीद मनदीप क घार पौंचिक मुख्यमंत्री न द्यायी श्रद्धांजळि
पौड़ी! जम्मू कश्मीरक गुलमर्ग मा शहीद ह्यां पोखड़ा सकनोळी क रैवासी मनदीप सिंह नेगी क पार्थिव शरैळ तिरंगा मा जन्न ऊंका गौं मा पौंची, त गाैं का सब्बि मनखियों क आंखियों मा पाणी ऐग्यायी।
24 बरसा क मनदीप 11 गढ़वाळ रैफल मा छायीं।
मुख्यमंत्री तीरथ सिंह रावतन शहीद मनदीप का घार पौंचिक श्रद्धांजळि द्यायी। मुख्यमंत्री शहीद क कुटम्दारि थैं हिकमत द्यायी अर ब्वाळ कि धन्य छन उ ब्वे-बुबा जौं क घार मा इन्न वीर सपूत न जनम ल्यायी अर अपड़ु नौ इतिहास का पन्नों मा लेखि द्यायी।
मुख्यमंत्री न घोषणा कायी कि शहीद मनदीप सिंह नेगी क गौं क सड़क क डामरीकरण करें जाळु अर सड्क्कि नौ शहीद मनदीप क नौ पर रक्खे जाळु।
मुख्यमंत्री क दगड़ा मा कैबिनेट मंत्री गणेश जोशी अर शासकीय प्रवक्ता मंत्री सुबोध उनियाळ न भी शहीद मनदीप थैं श्रद्धांजळि द्यायी।