पौड़ी, हरद्वार लोकसभा, कैका खुलला भाग

उत्तराखण्ड का पांच लोकसभा सीटुम बिटि भाजपा हाई कमानन अल्मोेड़ा, टिरी, नैनीताल लोकसभा सीटु मा प्रत्याशियों का नौ घोषित कै याली।

भाजपान टिहरी गढ़वाल बिटि माला राज्य लक्ष्मी शाह, अम्मोड़ा सीट बिटि अजय टम्टा त नैनीताल उधमसिंह नगर सीट बिटि अजय भट्ट तैं दुबरा टिकट दे द्यायी। अब उत्तराखण्ड मा द्वी सीट हरिद्वार अर पौड़ी लोकसभा सीट इन्न छन जै पर भाजपा हाईकमान अबि फैसला नी ल्यायी। इन्लै यु द्विया सीटु पर कु उमेदवार होलु यां की फुसर-पुसर चौछि़डि सुुरू ह्वेग्यायी। चौछड़ि चरचा या च कि पौड़ी अर हरद्वार सीट मा अब क्वीं नै उमेदवार तैं टिकट दियें जालु।

हरद्वार बिटि अबि निशंक अर पौड़ी सीट बिटि तीरथ सिंह रावत सांसद छन। निशंक द्वी साल तक प्रदेसा मुख्यमंत्री रैन। सांसद बणणा बाद 2019 मा केंन्द्रीय मानव संसाधन विकास मंत्री बि बणि। जुलै 2021 मा निशंक तैं केन्द्रीय शिक्षा मंत्री पद बिटि हट्ये ग्यायी।

त दूसर तरफा पौड़ी सीट बिटि सांसद तीरथ सिंह रावत मुख्यमंत्री क कुर्सी अचाणचक मिलि। मुख्यमंत्री कु ऊंकु कार्यकाल सबसे छवट्टु रायी। तीरथ सिरफ 114 दिन ही प्रदेसा मुख्यमंत्री कुर्सी मा बैठी सकिन। तीरथ रावत भाजपा का प्रदेस अध्यक्ष भी रैन। उन्न पौड़ी सीट मा 2019 मा मनीष खंडूडी तैं हरै।

हरद्वारा अर पौैड़ी सीट बिटि पैल्यक मुख्यमंत्री कु टिकट तैं रोकिकि भाजपा हाईकमान यु त साफ कै याली कि युु द्विया सीटु मा क्वीं नै उमेदवार ह्वे सकदु।

खबर त इन्न आणि च पौड़ी बिटि पैल्यक राज्य सभा सांसद अनिल बलूूनी टिकटा दौड़ मा पैलि नम्बर पर छन। वखि पौड़ी बिटि राष्ट्रीय सलाहकार अजीत डोभाल कु नौनु शौर्य डोभाल कु नौ बि चर्चा मा च। हरद्वार बिटि मदन कौशिक, यतीश्वरानन्द दौड़ मा छन पर यख त्रिवेन्द्र रावत कु नौ पैलि नम्बर पर च।

पौड़ी अर हरद्वार सीट बिटि टिकट कैथै मिलदु यु त अबि भवैष्य पुटगा मा च पर साफ च निशंक अर तीरथ कु टिकट कटे जाला अर कै नै उमेदवारा भाग पौड़ी हर हरद्वार बिटि खुळला।