उत्तराखण्ड राज्य सभा क एक सीट खूंणि ह्वै नामांकन, डॉ. कल्पना सैनी कु निर्विरोध राज्यसभा मा जाणु तय
देरादूण। उत्तराखण्ड मा राज्य सभा के सीट मा आज भाजपा क उमेदवार न अपड़ु परचा भौरि द्यायी। इस मौका फर मुख्यमंत्री पुष्कर सिंह धामी, भाजपा क प्रदेश अध्यक्ष मदन कौशिक हरिद्वार सांसद रमेश पोखरियाल निशंक, केंन्द्रीय राज्य मंत्री अजय भट्ट क दगड़ा मा भाजपा बड़ा- बड़ा नेता भि छायीं।
राज्यसभा क परचा विधानसभा सचिव क दप्तर मा भव्रें ग्यायी। डॉ. कल्पना सैनी क प्रस्तावक पुरोला विधायक दुर्गेश्वर लाल, अर कालाढूंगी का विधायक बंशीधर भगत भा वखम छायीं।
कल्पना सैनी न परचा भव्रण क बाद प्रेस मा बोलि कि भाजपान उ फर भरौसु कायी त वा पार्टी कु ऐ भरौसु अर आस पर ठकठकि (खरा) ह्वै कैकी काम कारली।
मुख्यमंत्री पुष्कर सिंह धामीन कल्पना सैनी थैं बधै द्यायी अर बोलि कि भाजपान सदनि व्यटूळों क ताकत थैं अगने बढ़ाणा कु काम कायी अर मिथैं या आस च कि देस क संसद मा कल्पना सैनी उत्तराखण्ड के व्यटूळों क धै थैं औरि कटकुटु (मजबूत) कारली।
बतै दियां बल कांग्रेस प्रभारी ब्याळि बोलि छायीं क कांग्रेस राज्यसभा मा अपडु उमेदवार थैं चुनौं मा खडु़ नि काराली। ईं बात से साफ च डॉ. कल्पना सैनी उत्तराखण्ड बटि राज्य सभा जाणी च।