मुख्यमंत्री न कायी कोविड-19 टीकाकरण क शुरूआत, वार्ड ब्याॅय शैलेन्द्र द्विवेदी थैं ळग्गि पैळु टीका
देरादूणः देश मा अजै दिन प्रधानमंत्री न वर्चुअळ माध्यम से कोविड-19 टीकाकरण की शुरूआत कायी। मुख्यमंत्री त्रिवेन्द्र सिंह रावत न ये कार्यक्रम मा दून अस्पताल मा भाग ल्यायी अर प्रदेशक सबि 13 जिळों मा कोविड-19 क टीकाकरण क शुरूआत कायी।
दून अस्पताळ मा सबसे पैळी टीका वार्ड ब्याॅय शैलेन्द्र द्विवेदी थैं लग्यें ग्यायी। शैलेन्द्र लगातार कोविड वार्ड मा ड्यूटी करणा छायी। वखि ऋषिकेश मा वार्ड ब्याॅय शिव सिंह नेगी थैं पैळु टीका लग्यें ग्यायी।
ऐ मौका पर मुख्यमंत्री न ब्वाळ कि आज सर्या दुनिया मा सबसे बड़ु टीकाकरण अभियानक शुरूआत ह्वैग्यायी। उन्न ब्वाळ कि राज्य मा एक लाख 13 हजार वैक्सीन उपलब्ध छन । 50 हजार स्वास्थ्य कर्मचारी थैं टीका ळग्यें कि टीकाकरण की शुरूआत करैं जाणी च। यांका बाद फ्रंट लाइन मा काम करण वळा, 50 साळ से जादा उम्र वळा मनखियों थैं टीका लग्यें जाळु।
मुख्यमंत्री न ब्वाळ कि मट्ठु-मट्ठु कैकि प्रदेशक सभी मनखियों कुु टीकाकरण करैं जाळु। उन्न प्रदेशक ळोगु से टीकाकरण थैं लेकैकि गळत प्रचार अर अफवा से बचणा कि अपीळ कायी।
ऐ मौका पर देरादूण क मेयर सुनीळ उनियाळ गामा, विधायक खजान दास, स्वास्थ्य सचिव अमित नेगी, अर महानिदेशक स्वास्थ्य डाॅ. अमिता उप्रेती मौजूद छायी।