भोळ खुलला भगवान बदरीनाथा क पाट

चमोली। भोळ सुबेर 7 बजिक 10 मिनट फर भगवान बदरी विशाला क् द्वार पूजा पाठ क बाद भक्तु खूंण ख्वलें जाला। भगवान नारायण क दर्शनु खूंण धाम मा भारी भीड़ ह्वैग्यें। धाम तैं 20 क्विंटल फुळु न सजयें ग्यें।

आज भगवान उद्वव अर कुबेर क डोळि बदरीनाथ धाम मा पौंचिग्यीं त वखि आदि शंकराचार्य क गद्दी अर रावल ईश्वरी प्रसाद लम्बूदरी भी धाम मा पौंचि ग्यीं।

आज पांडुकेश्वर मा योग बदरी अर कुबेर क मंदिर म साख पूजा कर्यें ग्यें। इस मौका फर ब्युटळौं न मांगल गीत लगयेंन अर ड्वाळा तैं बदरीनाथ धाम खूंणि फट्यायीं। पांडुकेश्वर योग बदरी बटि आदि गुरु शंकराचार्य की गद्दी, गाडू घड़ा बि बदरीनाथ धाम खूंणि पैटि। ब्यखूनी दा भगवान कुबेर अर भगवान उद्धव कु डवाळा बि बदरीनाथ धाम मा पौंचिग्यींन।