लोकसभा चुुनौ : नीं दिख्येंणि रंगमत

सर्या देसा मा लोकसभा चुनौ कु शंख बजिग्ये। जख एक तरफा क्वीं 400 पार कु नारा देंणु च, क्वीं लोकतंत्र तैं बचौंणा बाद करणु च।

उत्तराखण्ड मा पैलु चरण मा 19 अप्रैल खूणि बोट डळे जाला। आज बिटि सिरफ 19 दिन बच्यां छन। पर ऐसु चुनौ मा अबि तक कखि क्वी रंगमत नी दिख्येणि च। होरि कु खुुमार अर नौ वापिस लिंणाकु दिन बि खतम ह्वेग्यें पर अबि तक देरादूण क्य प्रदेस मा कखि बि इन्न महौल नी दिख्येणु च जै से ब्वले जै सकदू तक चुनौ ऐग्ये।

हाँ सोशल मीडिया मा हरीश रावता फोटो खूब दिय्येणि च, जै से इन्नु लगणु च हरद्वार बिटि हरीश रावत हि कांग्रेसा उमेदवार छन। विरेन्द्ररा मुखड़ि त कबि-कबि झल हत्थ जोड़िकि दिख्येंणि च। त त्रिवेन्द्र त उमेश कुमार सोशल मीडिया मा एक दुसरा पर गुगरौणा छन बस।

भाजपा क तरफा बिटि मुख्यमंत्री हि रोड शो करणा छन। यांका बाद बि चुनौ कु रंग कखि नी दिय्येणु च। सोशल मीडिया हि च जख बिटि जनता तैं पता चलणु च लोकसभा चुनौ ऐग्ये। झण्डा, डण्डा, पोस्टर, बैनर हार्डिंग, चुनौ कु हो-हल्ला अबि तक सब गैब छन।

यां से इन्न लगणु च की य त उमेदवार लोगु क बीच मा जाण से हिकमत नीं कै सकण छन या फिर पार्टिक भरोसु अर नौं पर चुनौ जितण की स्वच्णा छन, या फिर चुनौ मा कै दिल्ली वला नेता कु औंणा कु इंतजार करणा छन, जु ऊकीं नैया तैं छाल लगालु।