विपक्षन कानून बन्दबस्त पर सदन मा सरकार तैं घेरि
देरादूण। बजट सत्रा चौथु दिन मा आज सदन मा विपक्ष न कानून बन्दबस्त अर भ्रष्टाचार पर सरकार तैं घेरि अर सवाल पूछिन। सरकरि मंत्री जवाब मा बोलि कि ऊंका जवाब बाद मा भेजि द्युला। यांक बाद विपक्ष न बोलि कि जब जवाब बाद मा हि दिंणी व सत्र बुलौंणा कु क्य जरूरत च।
नेता विपक्ष यशपाल आर्य न पत्रकार वार्ता कायी अर बोलि कि सरकार गौळा तक भ्रष्टाचार मा डुबि च। उत्तराखण्ड मा माफिया राज चलणु च। सत्ता मा बैठ्यां लोग खनन माफियों क मदत करणा छन। शासन अर प्रशासन अर सत्ता का लोगु क मिलि भगत से खनन माफियों मदत करै जाणि च। प्रदेस मा कानून बन्दबसत पूरि तरौं से चौपट च ।
यशपाल आर्य न बोलि कि अधिकारी कैबि प्रोटोकॉल तैं नी मनणा छन। उन्न बोलि कि या से बड़ी बात हौरि क्य ह्वे सकद कि हाईकोर्ट भ्रष्टाचार क सीबीआई जांचा आदेश दिन्द अर सरकार जांच रव्कणा खूणि याचिका दायर कै दिन्द। उन्न उद्यान घपरोळ अर सिचैं घपरोळ क बात बोलि अर बोलि कि सरकार कतै नी चाणि च कि भ्रष्टाचार क मामला मा जांच हूंया। प्रदेस मा कानून बन्दस्त पर सवाल खड़ा करिन उन्न ब्यटुलों पर खळाखळ बढ़णा जुलम का बारा मा बोलि कि अंकिता क ब्वै-बुबा धरना पर बैठया छन पर ऊतैं निसाब नी मिलणु च। किलै नी मिलणु च, या बात सबि लोग जंणदा छन। उन्न बोलि कि भाजपा क खाणा दांत हौरि अर दिखौंणा दांत हौरि छन।