इंडिया गठबंधन अपड़ा जलणा अर अपणि कुटुम्दरि तैं बचौंणा कु गठबंधन च : धामी
UK Dinmaan
भाजपा स्टार प्रचारक मुख्यमंत्री धामी ने आज खूब प्रचार कायी। आज मुख्यमंत्रीन नै दिल्ली म भाजपा प्रत्याशी हर्ष मल्होत्रा खूणि बोट मंगिन। ऐ मौका पर मुख्यमंत्री धामीन कांग्रेस अर आम आदमी पार्टी क दगड़ि इंडिया गंठबंधन पर खूब हमला कायी।
मुख्यमंत्री धामीन बोलि कि एक तरफा देस समान नागरिक संहिता तरफा बढ़णु च, त दूसर तरफा कांग्रेस, आम आदमी पार्टी अर घमंडिया गठबंधना नेता अपणा घोषणा पतर मा समान नागरिक संहिता बारा म बात नी कैकि मुस्लिम पर्सनल लॉ क बात करणा छन। मुख्यमंत्री न बोलि कि क्य देस मा मुसिलम पर्सनल लॉ लागू हूंण चैंद या समान नागरिक संहिता कानून?
मुख्यमंत्री धामी न कर्नाटक कु जिकर कायी बोलि कि तुमन कर्नाटक मा देखि होलु? कर्नाटक मा एक खास धरमा लोगों तैं आरक्षण दिंणा कु काम हूंणू च। एसटी, एससी अर ओबीसी कु आरक्षण तैं खतम कैकि एक धर्मा लोगु तैं दिंणा कु काम सुरू करै जाणु च। आज हलात देखिकि इन्न लगणु च कि कांग्रेस हतास अर निराश च। कांग्रेसा घोषणा पतर देखिकि इन्नु लगणु च कि जन्न यु मुस्लिम लीग कु घोषणा पतर च।
मुख्यमंत्री धामी न यु दावा कायी कि पैलि त कांग्रेस सरकार मा हि औंण वलि किलैकि यु गठबंधन क्वीं सरकार बणौंणा कु गठबंधन नीं च। यु गठबंधन अपड़ा जलणा अर अपणि कुटुम्दरि तैं बचौंणा कु गठबंधन च। यु भ्रष्टाचार तैं छुपौंणा कु गठबंधन च।
मुख्यमंत्री न दिल्ली म कांग्रेस अर आम आदमी पार्टी क गठबंधन तैं ठग करणा कु गठबंधन बतै। उन्न बोलि कि आम आदमी पार्टी खूणि बोलि कि ईमानदारी कु ढोंग कैकि सत्ता म ऐ, अर आज केजरीवाल बेइमान अर शराब घोटाला मा जेल मा बंद छन।
मुख्यमंत्री न बोलि कि ईमानदारी कु झांडू लेकैकि औंणा बात करण वला आज जनतै क कमै पर भि झाड़ू लगै द्यायी इल्लै अब इन्न गठबंधन तैं जवाब देंणा कु बगत ऐग्ये।