गुरुकुल कांगड़ी हमरि पुरणि शिक्षा पद्धति थैं देस अर दुन्या मा फैळाणु च: अमित शाह

हरद्वार। केन्द्रीय गृह मंत्री अमित शाह अर मुख्यमंत्री धामी न आज गुरूकुळ कांगड़ी विश्वविद्यालय हरिद्वार कु 13 वु दीक्षांत समारोह मा भाग ल्यें। कार्यक्रम सै पैलि मुख्यमंत्री धामी न केंद्रीय गृहमंत्री अमित शाह कु स्वागत कायी। जैका बाद गुरुकुल कांगड़ी विश्वविद्यालय न अमित शाह तैं विद्या मार्तंड क मानद उपाधि द्यायी।

केन्द्रीय गृह मंत्री न कुल 255 छात्रु थैं स्तानक अर स्नातकोत्तर अर पीएचडी के उपाधि दीं। केन्द्रीय गृह मंत्री अमित शाह न दीक्षांत समारोह मा 182 छात्रु थैं गोल्ड मेडल दी अर ऊंकी उज्जवल भवैष्य कामना कायी।

अमित शाह न बोलि कि गुरुकुल कांगड़ी पिछळा 100 साळु बटि अपड़ा सिद्धांतु मा चलणु च। उन्न बोलि कि आज गुरुकुल कांगड़ी एक वटवृक्ष बणि हमरि पुरणि शिक्षा पद्धति थैं देस अर दुन्या मा फैळाणु च। उन्न बोलि कि गुरुकुल कांगड़ी न वैदिक शिक्षा क परंपरा क जोत थैं आज बि जल्युं च।
उन्न बोलि कि श्रद्धानंद जी न गुरुकुल कांगड़ी बटि एक अभियान सुरु कै छायीं, जै थैं आज गुरूकुळा छात्र देस अर दुन्या मा अगनै बढ़ौंणा कु काम करणा छन।

मुख्यमंत्री धामी न बोलि केन्द्रीय गृहमंत्री क कोसिस अर प्रधानमंत्री मार्गदर्शन मा आज सर्या भारत अप्फु थैं सुरक्षित अर अप्पु थैं पैळि से जादा संगठित अर आत्मविश्वास स भ्वरु समझणु च। मुख्यमंत्री न बोलि कि स्वामी श्रद्धानन्द जी इन्न सन्यासीं छायीं जौ न स्वामी दयानन्द सरस्वती जी क शिक्षाऔं कु प्रचार-प्रसार कायी। वु भारत क महान राष्ट्रभक्त संयासियौं मा अग्वानया (अग्रणी) छायीं। जौ न अपड़ि जिन्दगि स्वाधीनता, स्वराज्य, शिक्षा अर वैदिक धर्मा प्रचार-प्रसार खूंणि लग्यें दे।

ऐ मौका फर कैबिनेट मंत्री डॉ. धन सिंह रावत, पैल्यक मुख्यमंत्री अर सांसद डॉ. रमेश पोखरियाल निशंक, तीरथ सिंह रावत, पैल्यक मुख्यमंत्री त्रिवेंद्र सिंह रावत, सांसद श्रीमती माला राज्यलक्ष्मी शाह, राज्य सभा सांसद नरेश बंसल, डॉ. कल्पना सैनी छायीं।