उत्तराखण्ड कांग्रेस प्रदेस महामंत्री राजेन्द्र शाह न करन माहरा पर हि खड़ा करिन सवाल

देरादूण। कांग्रेस प्रदेसा अध्यक्ष कु वीडिया सोशल मीडिया मा वायरल हूंण क मामला मा कांग्रेसन प्रदेस महामंत्री राजेन्द्र शाह तैं नोटिस क्या दे कि राजेन्द्र शाह न करन माहरा पर हि सवाल खड़ा कै दीं।

राजेन्द्र शाह न सोशल मीडिया मा लेखिकि मितैं पीसीसी कु भेज्यूं पिरेम पत्र मिलि। उन्न लेखि कि जु वीडियो अध्यक्ष न मितैं भेजि छायीं, क्या कारण च वैथैं ब्यखुनी 3ः40 बजि डिलीट कर्यें ग्यें अर एडिट कैकि नै वीडियो 6 बजिकि 57 मिनट फर दुबरा भेज्यें ग्यें। उन्न लेखि कि या क दगड़ मा अपड़ा पेज मा बि वीडियो दुबरा डळणा क क्या जरुरत पोड़िग्यें ? मिथैं इन्न लगणु च कि तुमतैं यु बयान कि दुन्या गढ़वाल लोगु फर थुकणि च क जगा मा उत्तराखण्ड हूंण चैंण छायीं। क्वीं बात नीं च, मि अपडु जवाब भेजि द्यूलु , पर मेरी विनति च कि पिछल साल बटि फजीतु, फुद्दू जनि बोलिकि सोशल मीडिया मा खळाखळ कांग्रेस क बेजति हूंणि च, वैका बारा मा कब ब्वलें जालु, क्या मितैं सर्या कागजौं क दगड़ मा कांग्रेस तैं बचौंणा क लड़ै लड़ण प्वाड़लि उत्तराखण्ड बटि दिल्ली तक एक कार्यकर्ता बणिकि।

राजेन्द्र शाह चिट्ठी लेखणा क बाद बि चुप नीं रायीं उन्न मीडिया मा बोलि कि करन माहरा तैं बतौंण चैंद कि ऊंका दगड़ मा लोग किलै नीं जुड़णा छन। उन्न बोलि कि अगर जनता ऊंका दगड़ मा नीं जुड़णि च, त उ इन्न गलत बात कराळा, उन्न बोलि कि करन महरा ब्वना छन कि गढ़वाला लोगु फर दुन्या थुकणि च। उन्न बोलि करण माहरा तैं यु बतौंण चैंद कि इन्न कख हूंणू च। उन्न बोलि कि अगर गढ़वाल मा लोग तुमरि जातरा मा नी आणा छन त तुम ऊ खूंणि गलत ब्वलला।

वखि राजेन्द्र शाह न बोलि कि मितैं पता च, तुम मिथैं 6 साल खूंणि पार्टी बटि भैर कै देला पर मि 6 साल तक इंतजार करळु पर चुप नीं रौलु।