चारधाम जातरा मा पंजीकरण कु विरोध, तीर्थ पुरोहित हूंया छन ठरठरा

देरादूण। चारधाम जातरा खूंणि पंजीकरण सुरू हुयां एक हफता ह्वैग्यें अर 1 लाख 40 हजार जातरियौं न पंजीकरण कर्यें याली। त दूसर तरफा प्रदेस क रैवासी अर तीर्थ पुरोहित जातरियौं कु पंजीकरण कर्यें जाणा कु विरोध करणा छन।

बतै दियां कि ऐसु क साळ सरकारन चारधाम जातारा मा जातरियों पर पंजीकरण कैकि जातारा मा आणा क नियम बण्यूं च। अर जातारा मा औंण वळु जातरी तैं पंजीकरण करौणु जरुरी च। याका बारा मा सरकार कु ब्वन च कि हमथैं जातरा मा कतगा जातरियौं ऐं यांका बारा मा सै सै जाणकारि मिळि जाली।

सरकार कु ऐ फैसळा कु तीर्थ पुरोहित विरोध करणा छन। ऊंकु ब्वन च कि सरकारा कु यु बन्दबस्त प्रदेस रैवासियों खूंणि दिकदरि पैदा करणु। चारधाम तीर्थ पुरोहितौं क महापंचायत न मुख्यमंत्री पुष्कर सिंह धामी थैं यांक विरोध मा एक ज्ञापन दे।

महापंचैता महासचिव डॉ बृजेश सती न बोलि कि पंजीकरण जरूरी हूंण से ळोग थैं दिकदारि हूंणि च। उन्न जातरा मा संख्या तय करणा क बन्दबस्त थैं खतम करणा क मांग कायी। मुख्यमंत्री न बोलि कि वु जल्दी हि तीर्थ पुरोहितौं क दगड़ मा बैट्ठी की बात कराळा अर जु जरुरी होळु वु कराळा।