चमोली क घटना क मजिस्ट्रियल जांच पूरी, तिन्या कम्पनी काली सूची मा, जमा 110.75 लाख रुप्या जफत कर्यें जालु

देरादूण। चमोली क घटना क मजिस्ट्रियल जांच पूरी हूंणा क बाद करि संस्तुति मा तिन्या कम्पनियौं तैं काली सूची (ब्लैक लिस्ट) मा डालिकि ऊंकी जमा 110.75 लाख रुप्यौं तैं जफत (जब्त) कर्यें जालु। ऐ मामला मा तालमेल नीं हूंण फर विद्युत विभाग अर जल संस्थान कर्मचारी, अधिकारियौं पर बि खिलाप कारवै क संस्तुति कर्यें ग्यें।

19 जलै खूंणि चमोली मा नमामि गंगे क सीवरेज ट्रीटमेंट प्लांट मा करंट ऐग्यें छायीं जै से वख 16 ळोग म्वोरि ह्वैग्यें छायीं। यीं घटना क बाद मुख्यमंत्री न मजिस्ट्रीयल जांचा आदेश दियां छायीं। जैका बाद जिलाधिकारी चमोली न अपर जिला मजिस्ट्रेट डॉ. अभिषेक त्रिपाठी तैं मामला मा जांच करणा दियीं छायीं।
जांच मा एडीम न 39 ळोगु क बयान ली अर औरि सबुतौं क बाद अपणि जांच द्यायी। जांच मा या बात समणि ऐ कि नमामि गंगे मा काम करिण वेंचर फर्म पटियाला अर कान्फिडेंस इंजीनियरिंग प्राइवेट लिमिटेड कु समझौता तैं खतम कैकि ऊंतैं काली सूची मा डल्यें जाणा क संस्तुति कर्यें ग्यायी। यांका दगड़ भास्कर महाजन क फर्म एक्सिस पॉवर कंट्रोल्स तैं बि प्रदेस अर देस मा काली सूची मा डल्यें जाणा क संस्तुति कर्यें ज्यां। यांक दगड़ा मा समझौता के बच्यूं बगत मा अनुबंध सीवरेज ट्रीटमेंट प्लांट मा मेन्टिनेंस पर आण वळु खर्चा अर औरि कामु मा हूंणि वला खर्चाैं तैं ज्वांइट बेंचर फर्म बटि राजस्व क तरौं वसूल कर्यंे जाणा क संस्तुति कर्यें ग्यें। ज्वांइट वेंचर फर्म क उत्तराखण्ड पेयजल निगम तैं दीं 110.75 लाख रुप्यौं क बैंक गारंटी तैं जब्त करणा कु संस्तुति कर्यें ग्यें।

घटना क जिम्मेबार ज्वाइंट वेंचर फर्म व एक्सिस पावर कंट्रोल्स क खिलाप विधि अनुकूल दंडात्मक कारवै करणा क संस्तुति कर्यें ग्यें। विद्युत विभाग अर जल संस्थान क बीच मा तालमेल क कमी क कारणया घटना ह्वै यां खूंणि जिम्मेबार कर्मचारियौं क खिलाप बि विधि अनुकूल कारवै करणा क संस्तुति कर्यें ग्यें।