अमृता रावत एम्म ऋषिकेश अस्पताल मा भर्ती, नौना-ब्वारी सहित महाराज भी संक्रमित

UK Dinmaan

देहरादूण। उत्तराखण्ड मा आज इतवार मा बड़ी खबर आणि च। बतैं इन जाणु च सतपाल महाराज सहित ऊंका नौना ब्वारी भी कोरोना संक्रमित छन।

प्रदेश मा ब्याळी ही पर्यटन मंत्रि सतपाल महाराज की धर्मपत्नी श्रीमती अमृता रावत कि जांच रिपोर्ट पाॅॅजटिव आण से घपरोल ह्वै ग्याई छायी। किलैकि खबर इन आणि छायी अमृता रावत थैं द्वी तीन दिन पैलि बटि बुखरा छायी। अर ये बगत कैबिनेट मंत्री सतपाल महाराज अपड़ा विधानसभा क्षेत्र मा धर्मपत्नी, नौना, ब्वारी सहित राहत सामान वितरण कार्यक्रम मा शामिल छायी।

सतपाल महाराजळ द्वी दिन पैलि ही मंत्रिमण्डल की बैठक मा भि भाग ल्यायी छाई।

आज ही सतपाल महाराज दगड़ी 42 मनखियों का सैम्पल जांच खुणि भैज्येंंगेे छायी। जैमा खबर इन च कि सतपाल महाराज, यूंका नौना अर ब्वारी सहित 17 मनखि कोरोना संक्रमण से ग्रसित छन। जैमा ज्यादारत ऊंका घार मा काम करण् वाळा लोग ही छन।

इनमा अब या बात गौरकरण वाळी च कि सतपाल महाराज पिछल कुछ दिन बटि लगातार अपणा विधान सभा क्षेत्र सडियाखाळ, संगलाकोटी सहित काॅलागाड़ राहत वितरण कार्यक्रम मा नौना ब्वारी सहित शामिळ छायी। जैकारण से अब जनता पर भी संक्रमणकु खतरा पैदा ह्वै ग्यायी ।

अमृता रावत थैं आज दिनमा एम्स ऋषिकेश मा अस्पताल मा भर्ती कैर ग्याई। वखि देहरादून का मुख्य चिकित्साधिकारी डाॅ. बीसी रमोळा ळ ब्वाल कि शनिवार खुणि श्रीमति अमृता रावत की जांच रिपोर्ट मा कोरोना संक्रमण की पुष्टि ह्वैग्या छाई, तब बटि अमृता रावत पृथक वास म च।

वखि एम्स ऋषिकेश मा जनसंपर्क अधिकारी हरीश थपलियाळ न बताई कि अमृता रावत थैं अस्पताल मा अलग वार्ड मा भर्ती कैर ग्याई, जख ऊंकू उपचार चलणु च।