उत्तराखण्ड सरकार का तीन साल पूरा हूंण पर 23 मार्च खुणि मन्यें जालु ‘सेवा दिवस’
धामी सरकार का तीन साल पूरा हूंणा मौका पर मुख्यमंत्रिन दिल्ली बिटि वर्चुअल बैठक कायी अर अप्सरु तैं निर्देश दींन के 22 मार्च बिटि 25 मार्च तक सर्या प्रदेसम धूमधाम से मन्यें ज्यां अर सीधा जनता से जुड़णा कोसिस करे ज्यां।
मुख्यमंत्रिन 23 मार्च तैं सेवा दिवसा रुपम मन्यें जाणा का निर्देश दींन अर बोलि कि सरकार क तीन साल पूरा हूंणा मौका पर विकासखण्ड स्तर पर बहुउद्देशीय शिविर लग्यें ज्यां। उन्न बोलि स्वास्थ्य शिविर लग्यें ज्यां अर जरुरतमंद लोगु की स्वास्थ्य जांच अर जौ तैं स्वास्थ्य उपकरण जरुरत च ऊतैं स्वास्थ्य उपकरण बि दियें ज्यां।
मुख्यमंत्रिन बोलि कि मि दिल्ली मा छाैं, पर ज्यूं त वखि लग्यूं च अर प्रदेसा विकास बारम स्वचणु च।
उन्न बोलि कि सरकारा तीन साल पूरा हूंणा मौका पर उर्यें जाण वला कार्यक्रम मा समाज सबि लोगु अर क्षेत्रा लोगु तैं ज्वड़े ज्यां।
मुख्यमंत्रिन बोलि कि यूं तीन सालुम प्रदेसम खुब विकास ह्वे। कतगा इन्न फैसला लिये ग्यीन, जु प्रदेसा भलै वास्ता बौत जरुरी छायीं। समान नागरिक संहिता, सख्त नकल विरोधी जन्ना फैसला लिये ग्येन। जै से सर्या देसम प्रदेसा एक अलग पछ्याण बणि। प्रदेसा अर्थव्यवस्था हौरि कटकुटु करणा वास्ता पैलि बार प्रदेस कु बजट 1 लाख करोड़ पार पौंछिग्ये।
मुख्यमंत्रिन अधिकारियों तैं निर्देश दींन कि प्रदेसम पाणि क स्रोत तैं बचौंणा वास्ता चाल-खाल, गाड-गदेरों तैं दूबरा ज्यूंदू करणा कोसिस करे ज्यां।
बैठकम मुख्य सचिव श्रीमती राधा रतूड़ी, अपर मुख्य सचिव आनन्द बर्द्धन, प्रमुख सचिव न्याय प्रदीप पंत, प्रमुख सचिव एल.फैनई, आर.मीनाक्षी सुदंरम, डीजीपी दीपम सेठ, सचिव अर सबि विभागु का विभागाध्यक्ष जुड़यां छायीं।