डबल इंजना सरकार प्रदेस तैं विकासा बाटों मा अगनै बढ़ाणि च : धामी

प्रदेस सरकारा तीन साल पूरा हूंण पर आज उधमसिंह नगर जिला प्रशासन न सेवा, सुशासन अर विकास कार्यक्रम उर्यायीं। जैमा मुख्यमंत्रिन भाग ल्यायी। मुख्यमंत्रिन गल्ला मंडी बिटि कार्यक्रम स्थल तक रोड शो कायी। जख लोगुन ढोल, दमौ, बजिकि मुख्यमंत्री कु स्वागत कायी। यांका बाद मुख्यमंत्रिन अपणा तीन सालु कामु का बारम जनता तैं बतै।

ऐ मौका पर मुख्यमंत्री धामिन नगर निगमा कु बण्यूं वेंडिंग जोन कु शुभारम्भ कायी अर दुकानदारु तैं चाबी दींन। मुख्यमंत्रिन करोड़ रुप्यौं से बणण वलि विकासा योजना कु लोकार्पण अर शिलान्यास बि कायी।

मुख्यमंत्रिन प्रदेस सरकार तीन सालु क कर्या कामु का बारम लोगु तैं बतै अर बोलि डबल इंजना सरकार प्रदेस तैं विकासा बाटों मा अगनै बढ़ाणि च। उन्न बोलि कि तीन सालु मा प्रदेस सरकारन बौत बड़ा बड़ा फैसल लिन। जैमा नकल विरोधी कानून, भू-कानून, यूसीसी जन कानून बण्यें ग्यींन। उन्न बोलि प्रदेसा जिमदारु तैं खेती का औजार, बिना ब्याज कु करज दियें जाणु च।

मुख्यमंत्रिन बोलि कि चुनौ मा हमन जु वादा कर्यां छायीं वैमा हमन 70 से जादा पूरा कै यालिन अर बच्यां 30 फीसदी पर सरकार काम करणि च। उन्न बोलि प्रधानमंत्री मोदी न बोलि छायीं की यु दशक उत्तराखण्ड कु दशक होलु त यांका वास्ता हम सब्यु तैं मिलिकि काम करण प्वाड़लु।