पहलगाम : आतंवादियों की पछ्याण न, हमतैं त निसाब चैंद

आपरेशन सिंदूर खतम ह्वेग्ये। 22 अप्रैल खुणि जब पहलगाम आतंकी हमला बाद सर्या देस एक जुट एक मुठ ह्वेकैकि खड़ु हूंयूं च अर पकिस्तानी आतंकावाद पर सेना कु ‘ऑपरेशन सिंदूर’ पर नाज करणु च। भारत सरकार पक्ष-विपक्षा सबि दलु का सांसदु कु प्रतिनिधि मण्डल तैं विदेस भ्यजणु च, सर्या दुन्या तैं यु बताैंंणा वास्ता की पाकिस्तान एक आतंकी देस च। । जैमा कुछ दल त विदेस चलि बि ग्येन।

यांका बाद बि देसा भितर राजनीति रुकण नौं नी लिंणि च। देसा भितर यीं पक्ष-विपक्षा दल कुकर-बिर्वळु जन्न लड़ै करणा छन। पैलि विदेस सचिव तैं लड़ै रवक्णा वास्ता, त कबि कर्नल सोफिया कुरैशी तैं आतंकवादियों कु बैणि बत्यें ग्यायी, त कैन सर्या देस अर सेना तैं मोदी क खुट्टौं मा नतमस्तक बतै दे।

अब कांग्रेसा निसाणा पर विदेश मंत्री छन। अर यांकु कारण च 15 मई खुणि विदेश मंत्री कु बयान कि ऑपरेशन सिंदूर सुरु करण से पैलि हमन पाकिस्तान तैं बतै दे छायीं कि हम आतंकी ठिकाणों पर हमला करण छौ। विदेश मंत्री की या बात जन्नि वायरल ह्वे उन्न विपक्ष तैं सरकार तैं कठघरा म खडु़ करण कु मौका मिलिग्ये। यांकी सुरुवात राहुल गांधी न कायी। राहुल गांधी विदेश नीति पर सवाल खड़ा करिन अर बोल कि आतंकवादी खिलाफ ऑपरेशन सुरु करण से पैलि पाकिस्तान तैं बतौंण क्य देशद्रोह नीं च। राहुल गांधी बोलि कि विदेश मंत्री जयशंकर तैं यु बतौंण चैंद कि क्य उन्न पाकिस्तानै धरती पर आतंकवादी ठिकाणों तैं निसाण बणौंण से पैलि पाकिस्तान तैं बतै छायीं?

राहुल गांधी का यीं सवाल भाजपा कु जिकुड़िम इन्न लगिन की भाजपा कु आईटी सेल न, राहुल गांधी की पूछ्यां सवालु कु जवाब त नीं द्यायी पर राहुल गाधी की अद्दा मुखड़ि त अद्दा आसिम मुनीरा मुखड़ि सोशल मीडिया मा चिपकै दे। उन्न लेखि कि राहुल गांधी खुणि अगनै क्या? निसान ऐ पाकिस्तान?

यांका बाद कांग्रेस बि कख पिछने रैंण वलि छायीं। कांग्रेसन प्रधानमंत्री मोदी अर पाकिस्ताना पैल्यक प्रधानमंत्री नवाज शरीफा फोटो तैं जोड़िकि सोशल मीडिया चिपकै द्यायी।

अब आपरेशन सुरु करण से पैलि हमन पाकिस्तान तैं बतै छायीं की ना। यांकु जवाब त कैन नीं द्यायी पर विदेश मंत्री तैं बचौंण वास्ता ऐ मामलम निशिकान्त दुबे बि अपणि खुट्टि फंसै दे।

निशिकान्त दुबे न बोलि कि राहुल गांधी पता हूंण चैद कि 1991 म कांग्रेस सरकारन पाकिस्तान दगड़ि एक समझौता कै छायी कि भारत-पाकिस्ताना बीच क्वीं बि सेना की कारवै होलि त, पैलि एक दूसर तैं पैलि बत्यें जाली। क्य यु देशद्रोह नीं च?। कांग्रेस कु हत्थ पाकिस्तान बोट बैंका दगड़ि च, विदेश मंत्री एस जयशंकर पर टिप्पणी तुमतैं शोभा नीं देन्दि। उन्न बोलि उबरि जु बि सरकार छै अर जैन बि यु करार कायी, वे फर देशद्रोह कु मुकदमा चलण चैंद।

यखम बडु सवाल यों च कि निशिकान्त दुबे जयशंकर तैं बचौंणा छन कि जय शंकरा यीं बात तैं सै साबित करणा छन कि ऑपरेशन सिंदूर सुरु करण से पैलि उन्न पाकिस्तान तैं बतै की कुछ बि गलत नीं कायी।

अब दुसर सवाल च कि निशिकान्त दुबे करार कब ह्वे यु त पता चलिग्ये पर किलै ह्वे यांका बारम क्वीं जाणकारी नीं च अर ना उन्न करार तैं पढ़णा की कोसिस हि कायी। अब निशिकांत दुबे करार तैं पढ़दा बि कनुकैकि किलैकि ऊंकी डिग्री पर बि पैलि बटि सवाल खड़ा छन।

या बात सै च की साल 1991 भारत अर पाकिस्ताना बीच समझौता ह्वे छायीं। पर यु समझौत लड़ै से पैलि एक दुसर तैं बतौंणा कु नीं छायीं। यु समझौंता छायीं कि अगर भारत- पाकिस्तानम बटि क्वीं बि देस अपिण केरा भितर क्वीं बि सेनाभ्यास कारलु त पैलि एक दुसर देस तैं बतौंण प्वाड़लु। अर वु इल्लै कि कखि क्वीं बि देस इन्न न समझया कि हम पर हमला तय्यरि हूंणि च।

निशिकान्त दुबे या फांस त राहुल गांधी खुणि लगौंणा छायीं पर ज्यूडू उन्न अपणा हि गौळम बांधि द्यायी।

अब या त सबि राजनैति छ्वीं-बत्था छन अर सिरफ अर सिरफ अपणा टंगडु मत्थी धैरिकि अपड़ि पार्टी पर लोगुक बीच मुखड़ि तैं चमकौंणा बात च बस।

सवाल यों च कि एक तरफा त हम सर्या दुन्या तैं यु बतौंणा खुणि कि पाकिस्तान पहलगाम मा आतंकी हमला कैकि हमर 26 लोगु तैं मारि दे। यांका बाद भारत सरकारन 7 मई खुणि ऑपरेशन सिंदूर सुरु कायी अर पाकिस्तान आतंकी ठिकाणौं तैं बरबाद कै दे।

अब अगर देसम क्वीं यु सांसदु से सवाल पूछला कि ब्याली तक ‘जुट एक मुट्ठा बात करणा, आज एक दुसर तैं आंख घुरौंण छन त यांकु जवाब क्य होलु? विदेश मंत्री तैं यु पूछिये बि ग्यायी कि क्य तुमन पहलगाम क आतंकी हमला करण वला आतंकियों तैं मारि दे। त विदेश मंत्री कु जवाब छायीं हमन ऊंकी पछ्याण कै याली, अगला सवाल।

आज हम ऑपरेशन सिंदूर कु सफल हूंण पर सर्या देसम तिरंगा जातरा निकलणा छा अर सेना कु शौर्य कु राजनीतिकरण करणा छा। यु बस त ठीक च पर जन्नि आतंकियोंक् बारम क्वीं सवाल पूछणा छा, त ब्वलें जाणु च तुम पाकिस्तान भाषा ब्वना छन। सवाल सरकार से पूछा त, ब्वलें जाणु च तुम सेना पर सक करणा छा, देस से सवाल करण छा, तुम देशद्रोही छा।। यखम या बात कतै समणम नीं औंणि च आखिर सरकार देस कब बिटि ह्वेग्ये। सरकार क्वीं देस नीं च किलैकि सरकार औंणि जाणि रैन्दन पर देस सदनि रैंद।

आज हम एक दुसरा का जलड़ा त खूब खैंडणा छौ पर पाकिस्तान बटि बोर्डर पार कैकि आतंकी पहलगाम मा कनुकैकि ऐग्येन या बात हमतै पता नीं। पता नीं त क्वीं बात नीं पर, पहलगाम बिटि आतंकी कख गैनी या बड़ी बात च। जम्मू-कश्मीर पुलिस, सर्या इन्टैलिजेंस कैकि जिम्मेबरि च। पहलगाम आतंकी हमलमा म्वर्यां निर्दोष लोगु कु हत्या खुणि कु जिम्मेबार च? यांकु जबाव हमतैं कु देलु? आखिर देसा रैवासियों की सुरक्षा जिम्मेबरि कैकि च।

आज हम सर्या देसम तिरंगा जातरा निकलणा छा भारतीय सेना पाकिस्तानम आतंकियों का ठिकाणों तैं खतम कै याली, 100 से जादा आतंकी तैं मारि दे। सर्या देस बौत खुस च, भारतीय सेना पर देस तैं गर्व च। हमन पाकिस्ताना दांत तोड़ि दीं पर सवाल त यांक बाद जि ज्यूंदा च अर मेरी जिकुड़ि त तब तक तिस्याळि हि राली, जब तक ऊं चार आतंकवादी ज्यूंद छन, जौन पहलगाम मा निर्दोष लोगु की हत्या कायी। हमन आतंवादियों तैं पछ्याण याली, अब हमतैं इन्ना जवाब नीं च्येंदा, हमतैं आतंवादियों कु मुण्ड चैंद, हमतैं पहलगाम कु निसाब चैंद बस। एक मैना से जादा ह्वेग्ये आखिर पहलगाम मा आतंकी हमला करण वला आतंकवादी कख गैन, ऊंतै या धरति खै ग्ये या फिर ऊंतै असमान ऊंतैं खै ग्ये, हमतैं यांकु जवाब चैंद, अर सर्या देस यांकु जवाब मंगणु च।