तीन सालु मा बौत दिक्कत समणि ऐन, पर हमन ऊंकु हल कायी
अपणि सरकारा का तीन साल पूरा हूंण पर मुख्यमंत्री धामिन आज मुख्य सेवक सदनम पत्रकारु दगड़ि छ्वीं बत्थ लगैनि अर प्रदेस सरकारा काम अर भवेष्यम जु काम करे जणि वांका बारम चर्चा कायी।
मुख्यमंत्रि बोलि कि भ्रष्टाचार, अतिक्रमणअर अवैध कब्जौं पर सरकार न मार कायी अर अगनै बि काराली। उन्न बोलि कि तीन सालु मा बौत दिक्कत समणि ऐन, पर हमन लोगुक बीच खड़ा ह्वेकि ऊंकु हल कायी।
रैणी, सिलक्यारा,केदारघाटी अर अबि मा माण मा अयीं आपदा क बारम बतै अर बोलि कि यीं मुसिबत कु बगत मा पिछने रैकि काम नीं करे जान्दु।
मुख्यंत्रिन बोलि कि प्रधानमंत्रिन 2047सम विकसित भारता की सौं लियीं च, यांका बा वास्ता हमतैं अपणि पूरी तागत लगै कि काम करण प्वाड़लु। उन्न बोलि कि उत्तराखण्डम अवैध निर्माण, अतिक्रमणा खिलाप अभियान लगातार जारी रालु। भ्रष्टाचार पर हौरि सखत मार करे जाली।
मुख्यमंत्रिन बोलि कि हमन ब्युटलौं तैं 30 प्रतिशत आरक्षणा दगड़ि लखपति दीदी जनि योजना बणै कि मातृ शक्ति तैं कुटकुटु बणौंणा कु काम कायी। राज्य आन्दोलनकारियों तैं 10 प्रतिशत क्षैतिज आरक्षण, प्रवासी उत्तराखण्डियों तैं प्रदेस से जोड़ि।
मुख्यमंत्रिन बोलि कि प्रति व्यक्ति आय कु मामला मा सर्या देसम हम तेरा नम्बर पर छौ, जु हम खुणि बौत अच्छी बात च।
मुख्यमंत्रिन बोलि कि रजत जयंती साल मा प्रदेस कु साल भरकु बजट एक लाख करोड़ से जादा वु बतौंणु च कि हम सै बाटा मा अगनै बढ़णा छौ।
मुख्यमंत्रिन बोलि कि अगिल साल 2027 कुंभ अर यांका बाद नंदा राज यां खुणि सरकार अबि बिटि त्यरि करणि च। उन्न राष्ट्रीय खेलु की बि चर्चा कायी।
ये मौका पर विधायक खजान दास, महंत दिलीप रावत, राजकुमार पोरी अर सचूना महानिदेशक बंशीधर तिवारी बि छायीं।