इस्कुळु मा श्रीमद भगवत गीता पढ़यें ज्यां : मुख्यमंत्री धामी
मुख्यमंत्री धामिन आज मुख्यमंत्री कैम्प कार्यालयम शिक्षा विभागा समीक्षा बैठक कायी अर निर्देश दींन की इस्कुळुम बच्चों तैं श्रीमद भगवत गीता पढ़यें ज्यां। उन्न बोलि कि शिक्षा का तोक मा 10 बरसा नीति त्यार कैकि काम करे ज्यां।
मुख्यमंत्रिन बोलि कि दिसम्बर 2026 तक शिक्षक क्षेत्रम सबि गतिविधियों कु रजतोत्सव कलेण्डर बण्यें ज्यां। उन्न बोलि बस्गाळ सुरु हूंण सै पैलि प्रदेसा सबि इस्कुलुुम निरीक्षण करे ज्यां अर इस्कुलौं का बाटा, पुळु अर हौरि सुविधौं तैं बि दिख्यें ज्यां।
मुख्यमंत्रिन बोलि कि कलस्टर इस्कुलम आवासीय हॉस्टल की सुविधा खुणि हौरि प्रदेसु कु अध्ययन कैकि प्रस्ताव बण्यें ज्यां अर यु बि तय करै ज्यां कि आवासीय हॉस्टलु मा अच्छी सुविधा हूंण चैंदन। पैलु चरणम हरेक जनपदु म एक-एक आवासीय हॉस्टल बण्यें ज्यां। 559 कलस्टर इस्कुळुम 15 किलोमीटरा भितर इस्कुळयां नौनियाळु का वास्ता औंण जणा वास्ता गाड़ी कु बन्दुबस्त करणा खुणि प्रस्ताव बणौंणा का निर्देश मुख्यमंत्रिन दींन।
मुख्यमंत्रिन बोलि कि यु तय करे ज्यां कि हरेक साल बच्चों तैं पाठ्यपुस्तक बगत मा मिलि जाण चैंद। उन्न बोल कि शिक्षा विभागम ट्रासंफर प्रक्रिया छाळि हूंण चैंद। मुख्यमंत्रिन बोलि कि एनसीसी अर एनएसएस तैं बढ़ावा दिये ज्यां।
मुख्यमंत्रिन बोलि वु इस्कुळु की खस्ता हाल इमारतु तैं टमणा कु काम करे ज्यां। इस्कुळुम बच्चौं की सुरक्षा कु खास ध्यान धरै ज्यां यामा लापरवै कतै नीं हूंण चैंद।
मुख्यमंत्रिन बोलि शिक्षम गुणात्मक सुधार खुणि संसाधनों मा क्वीं कमी नीं होलि।
मुख्यमंत्रिन बोलि कि बच्चों तैं नैतिक शिक्षा, पर्यावरणीय शिक्षा, प्रदेसा सांस्कृतिक विरासत, महानुभावों कु उल्लेख, क्षेत्रीय दरकारा हिसाब से कौशल विकास, स्वास्थ्य शिक्षा, लोककथा, लोक साहित्य, संगीत अर कला तैं पाठ्यक्रम मा सामिल करे ज्यां।