अक्षय तृतीया पर माँ गंगोत्री अर माँ युनोत्री का खुलिन द्वार
अक्षय तृतीया कु त्यावार फर आज चारधामा जातरा सुरु ह्वेग्ये। आज सुबेर पैलि साढ़े दस बजिकि 30 मिनटम गंगोत्री धामा द्वार ख्वलें ग्येन। यांका बाद 11 बजिकि 50 मिनट पर यमुनोत्री धामा द्वार ख्वलें ग्यीन।
द्विया धामा द्वार खुलणा मौका पर मुख्यमंत्री धामी वखम छायीं। ये मौका पर हेलीकॉप्टर बिटि फुळुकि बरखा करे ग्यायी। अब द्वी मई खुणि केदारनाथ अर चार मई खुणि बदरीनाथ धामा द्वार खुलला।
मुख्यमंत्री धामी द्विया धामु मा प्रधानमंत्री मोदी क नौं क पैलि पूजा कायी अर चारधाम जातरा क सुफल आयोजन अर देस-प्रदेस राजि खुसी रंया या कामना कायी।
आज सुबेर मां गंगा की उम्सव डोली भैरव घाटिम भैरव मंदिर बिटि श्री गंगोत्री धाम पौंछि। गंगोत्री धामम विशेष-पूजाक दगड़ि 10 बजिकि 30 मिनटम गंगोत्री धाम द्वार ख्वलें ग्यीन। वखि मां यमुनाक डोली शीतकालीन प्रवास खरसाली बिटि यमुनोत्री धाम पौंछि।
धार्मिक विधि -विधान क दगड़ि 11 बजिकि 55 मिनट पर श्री यमुनोत्री धाम द्वार ख्वलें ग्यीन।
मुख्यमंत्रिन बोल कि उत्तराखण्डा चारधाम सर्या दुन्या कु आस्था च अर यु धामु का दर्शन करणा की सबि श्रद्धालुओें तैं लालस रैंन्द।
मुख्यमंत्रिन बोल कि चारधाम जातरा खुणि सरकारन सबि बन्दुबस्त कर्या छन। जातरियों तैं क्वीं दिक्कत नीं हूयां या खुणि यातायात बन्दुबस्त पर साख ध्यान दिये ग्यायी।
मुख्यमंत्रिन बोलि कि हमरि अतिथि देवो भवः की परम्परा च। चारधाम जातरा पर औंण वला सबि जातरियों देवभूमि उत्तराखण्डा धामु की आसीस दगड़ि ऊंकी जातरा सुफल हूयां।