भगवान बदरीनाथ : टिरी राजदरबार बिटि सुरु ह्वे गाडू घड़ा जातरा

भगवान बदरीनाथ की गाडू घड़ा जातरा आज मंगळवार खुणि पूजा-पाठ बाद राजदरबार नरेन्द्रनगर म सुरु ह्वेग्ये।
राज दरबारम टिरी सांसद मालाराज्य लक्ष्मी शाह, राजकुमारीश्रीजा अर हौरि ब्यटुळों न तिळु कु तेज पिरायीं।
डिमरी धार्मिक केन्द्रीय पंचैत क पदाधिकारियों गाडू घड़ा तैं बदरीनाथ धाम खुणि फट्यायी। यांका दगड़ि हि भगवान बदरीनाथा जातरक सुरुवात ह्वेग्ये।

पंडित आचार्य कृष्ण प्रसाद उनियाल न विधि विधान से पूजा कायी। भगवान बदरीनाथ पूजा कु तेज तैं पिराणा बाद महाराज मनुज्येंद्र शाह आरती कायी अर गाडू घड़ा डिम्मर पंचैत क सदस्यों तैं द्यायी।

पंडित उनियाल बतै कि धार्मिक पूजा पाठा बाद गाडू घड़ा जातरा क दगड़ि बदरीनाथ धाम जातरा सुरु ह्वेग्ये।

गाडू घड़ा तेल कलश जातरा भोळ सुबेर ऋषिकेश तपोवन कौड़ियाला, देवप्रयाग, श्रीनगर, रुद्रप्रयाग बिटि कर्णप्रयागा डिम्मर गौं पौंछलि। वख बिटि पांडुकेश्वर ह्वेकैकि तीन मई खुणि बदरीनाथ धाम पौंछलि।

भगवान बदरीनाथा कपाट चार मई खुणि सुबर खुलला। अर छै मैना भगवान बदरीनाथ अभिषेक ये तेलन हि होलु।