देवप्रयाग-सोड़ बिटि श्रीनगर जनासु तककी सुरंग उत्तराखण्डा विकास वास्ता एक ऐतिहासिक उपलब्धि च : मुख्यमंत्री धामी

केन्द्रीय रेल मंत्री अश्विनी वैष्णव अर मुख्यमंत्री धामिन आज जनासू पौड़ी गढ़वाल म ऋषिकेश-कर्णप्रयाग रेल परियोजनक सुरंग T-9 अर T-8M कु ब्रेकथ्रू क मौका पर उर्यूं कार्यक्रम भाग ल्यायी।

ऐ मौका पर केन्द्रीय रेल मंत्री अश्विनी वैष्णव अर मुख्यमंत्रिन सुरंग तैं बि देखि।

केन्द्रीय रेल मंत्री अश्विनी वैष्णव न सुरंग बोलि कि उत्तराखण्डा विकासा वास्ता यु एक बडु कदम च। उन्न ये काम वास्ता रेलवे का अधिकारी, कर्मचारी अर भुरत्यौं तैं बधै द्यायी। उन्न बोलि ऋषिकेश-कर्णप्रयाग रेल परियोजना कु काम बौत तेजी से हूंणू च। अर जल्दी ही यीं रेल लैन पर रेल चलण उमेद च।

केन्द्रीय मंत्रिन बोलि कि या परियोजना प्रदेस पाड़ि क्षेत्र तैं रेल नेटवर्क से ज्वड़ण की दिसा मा मील कु पत्थर साबित होलु।
उन्न बोलि या 14.75 किलोमीटरा लम्बी सुरंग उत्तराखण्ड ही ना बल सर्या देस की सबसे लम्बी सुरंग च। यीं रेल लैना बणण से ऋषिकेश बिटि कर्णप्रयाग कु सफर, जै तैं पूरु करणम सात घण्टा लगदन, द्वी घण्टा मा पूरू ह्वे जालु अर उत्तराखण्ड म पर्यटन अर आर्थिक विकास तैं अगनै बढ़लु। उन्न बोलि या चारधाम रेल लैन परियोजना तैं पूरु करणा दिसा मा बडु कदम च।

त वखि मुख्यमंत्री धामिन बोलि कि सुरंग उत्तराखण्डा विकास वास्ता एक ऐतिहासिक उपलब्धि च। उन्न बोलि ऋषिकेश-कर्णप्रयाग रेल परियोजना प्रदेसा दूर तोकम रैंण वला लोगु तैं देसा बाकी हिस्सों से ज्वड़णा कु काम कारली। या रेल लैन लोगु सफर तैं असान बणलि, अर पर्यटन, अर आर्थिक तैं नै दिसा देलि।
उन्न बोलि कि देवप्रयाग-सोड़ बिटि श्रीनगर जनासु तककी या सुरंग बौत बडु काम च अर यु काम बतौंणु च कठिण भौगोलिक परिस्थितिया हूंणा बाद हम विकासा कामु तैं करणा छा। उन्न बोलि टनकपुर बागेश्वर रेल परियोजना कु सर्वे ह्वेग्ये , अर जल्दी हि अगनै की कारवै करे जाली।