मुख्यमंत्रिन जल संरक्षण अभियान-2025सा कार्यशालम ल्यायी भाग

मुख्यमंत्रिन धामिन आज अपणा घौरा मुख्य सेवक सदनम जल संरक्षण अभियान-2025सा उर्यीं एक दिना कार्यशालम भाग ल्यायी। ऐ मौका पर उन्न जल संरक्षण अभियान-2025 सा थीम ”धारा मेरा, नौला मेरा, गाँव मेरा, प्रयास मेरा“ पर भागीरथ मोबाइल ऐप तैं सुरु अर विवरणिका कु विमोचन कायी।

भागीरथ मोबाइल ऐप क जरिया लोगु अपणा क्षेत्रा जल स्रोत क जाणकारी सरकार दगड़ि साझा कै साकला। ऐप के जरिया मिलि जाणकारिन सरकार पाणि क स्रोत तैं दुबरा ज्यूंदू करणा वास्ता काम कारली। मुख्यमंत्रिन बोलि कि प्रदेसम पाणि क स्रोत, नौलों, धारों अर बस्गल्या गदनौं तैं बचौंणा वास्ता स्पिं्रग एंड रिवर रिजुविनेशन अथॉरिटी (सारा) बण्यें ग्यायीं। सारा न पिछल साल विभागु दगड़ि मिलिकि प्रदेसम 6500 से जादा पाणि स्रोतु तैं बचौंण वास्ता काम कायी अर तकरीबन 3.12 मिलियन घन मीटर बरखा कु पाणि कु जामा (संरक्षण) बि कायी।

मुख्यमंत्रिन बोलि कि सारा क तरफा बटि जख एक तरफा सैंणा (शहरी) तोक म केन्द्रीय भू-जल बोर्डा मदतन भू-जल तैं दुबरा भ्वरणा कोसिस करे जाणि च। वखि प्रदेस गदनौं तैं दुबरा ज्यूंदू करणा की पैलि कोसिसम तकनीकी अर वैज्ञानिक दृष्टिकोण कु अधार पर नयार, सौंग, उत्तरवाहिनी शिप्रा अर गौड़ी गदनौं वास्ता आईआईटी रुड़की अर एनआईएच रुड़की क मदत न परियोजना रिपोर्ट बि त्यार करे जाणि च। मुख्यमंत्रिन बोलि कि जल उन्नति, प्रगति जीवन अर विकासा मुख्य अधार छन। उन्न बोलि पाणि बचौंणा क दिसा मा हमरि कोसिस लगातार चलणि छन। यांमा लोगुकि बि मदत लिये जाणि च। उन्न बोलि प्रधानमंत्रिन क मार्गदर्शन म प्रदेस खळाखळा अगनै बढ़णु च। उन्न बोलि 10 सालु मा उत्तराखण्ड तैं विकास बाटौं म लिजाण कु जु यु बगत च, सै बगत च। उन्न बोलि कि पाणि बचौंणा कु अभियान तैं गौं-गौ बिटि सर्या प्रदेसम चलयें जालु।
ऐ मौका पर कृषि मंत्री गणेश जोशी, विधायक खजान दास, मुख्य सचिव आनन्द बर्द्धन, प्रमुख वन संरक्षक डॉ. धनंजय मोहन, जलागम प्रबंधन बिटि श्रीमती नीना ग्रेवाल, पर्यावरणविद चंदन सिंह नयाल, कुंदन सिंह पंवार अर पर्यावरण अर पाणि बचौंणा वास्ता काम करणा लोगु छायीं।