बाबा केदारा पंचमुखी चल विग्रह उत्सव डोली पौंछि केदारनाथ धाम

केदारनाथ धामा द्वार भोळ सुबेर 2 मई खुणि विधि-विधाना दगड़ि ख्वलें जाला। ऐ मौका पर देस-दुन्याक भक्त केदारबाबा क् दर्शनु खुणि केदारघाटी म पौंछिग्येंन।

ऐसु केदारनाथ मंदिर तैं खास सजयें ग्यायी। गुजरात बिटि अयीं पुष्प समिति न मंदिर तैं 108 कुंटल फुळु न सजै याली।

मुख्यमंत्री धामी कु ब्वन फर जिला प्रशासनन द्वार ख्वलणा मौका पर खास बन्दुबस्त कर्यां छन। सुरक्षा, साफ-सफै अर यातायात, अर स्वास्थ्य सेवा तैं चख करे ग्यायी।

बाबा केदारनाथा द्वार खुलणा पर भक्तु मा खुब उमंग दिख्येणि च।

बाबा केदारा पंचमुखी चल विग्रह उत्सव डोली बि केदारनाथ धाम मा पौंछि ग्यायी।
केदारधामम भक्तु न फुळुकि बरखा कैकि बाबा केदारा पंचमुखी डोली कु स्वागत कायी। डोली तैं नै बण्यू भंडारगृह मा विराजमार करै ग्यायी। डोली कु स्वागत खुणि मंदिरम भक्ति संगीता कु समारोह उर्यें करे जालु

यां से पैलि सुबेर छै बजि गौरीकुण्डा गौरीमाई मंदिरम बाबा की चल विग्रह उत्सव डोली की गौरी शंकर गोस्वामी अर बागेश लिंग न पूजा कायी। भक्तु क जयकारा अर सेना बैण्डा बीच बाबा केदारा डोली केदानाथ धाम खुणि पैटिग्ये अर द्वफराम बाबा केदारा डोली केदारधाम मा पौंछिग्ये।

भोळ सुबेर 7 बजि केदारनाथ धामा द्वार ख्वलें जाला। यांका बाद छै मैना भगवान अपणा भक्तु तैं दर्शन द्याला।