गुप्तकाशी अर ज्योतिर्मठ मा खुलिन एक्सिस बैंका नै शाखा मुख्यमंत्रिन कायी वर्चुअल उद्धाटन

मुख्यमंत्री धामिन आज मुख्य सेवक सदन मा उर्यूं कार्यक्रम मा भाग ल्यायी अर गुप्तकाशी अर ज्योतिर्मठ मा एक्सिस बैंक का की नै शाखा कु वर्चुअल सुरुवात कायी।

ऐ मौका पर मुख्यमंत्रिन गुप्तकाशी अर ज्योतिर्मठम एक्सिस बैंक खुलण पर बौत खुसी जतै अर बोलि कि यां से बैंकिंग सुविधा बढ़लि। उन्न बोलि कि गुप्तकाशी अर ज्योर्तिमठ द्विया चारधाम जातरा वास्ता खास छन। यख बैंक खुलण से यख का रैवासी अर चारधाम जातरम आण वला जातरियों तैं फैदा होलु। मुख्यमंत्रिन बोलि कि प्रदेस सरकार सबि बैंकु तैं कटकुटु करणा वास्ता सबि तरौं से मदत कराली।

मुख्यमंत्री न बोलि कि ज्योतिर्मठ म भारत सरकारै मदतन 1700 करोड़ रुप्यौं से बि जादा की पुनर्वास योजना पर काम चलणु च। उन्न बोलि प्रधानमंत्री मोदी कु विकसित भारत कु स्वींणु तैं लेकैकि भारत अगनै बढ़णु च। अर या सौं तबि पूरि होलि जब प्रदेसा आखिर केर पर रैंण वला मनखि तैं विकास से ज्वडे़ जालु। उन्न बोलि प्रधानमंत्री न जन-धन योजना, मुद्रा योजना जन्नि योजना चलैकि देसा सबि मनखियों तैं बैंक से ज्वणा कु काम कायी। देसम 55 करोड़ से जादा जनधन खाता ख्वलें ग्यींन। खाता ख्वलण से योजनों कु पैसा सीधा खातम जाणु च।

मुख्यमंत्रिन बोलि कि प्रदेस सरकार वित्तीय समावेशन तैं हौरि कटकुटु बणौंणा वास्ता काम करणि च। वित्तीय अनुशासन बणौंणा मा देवभूमि उत्तराखण्ड दूसर नम्बर पर च अर सतत् विकास लक्ष्यों क सूचिम हमरु प्रदेस पैलु नम्बर पर च।

मुख्यमंत्रिन बोलि कि प्रदेस सरकारै कोसिस च कि बैंकिंग, वित्तीय सेवाए अर बीमा जन्नि सेवा हरेक मनखि तैं पौंछण चैंदन। प्रदेस सरकार ई गवर्नेस, मोबाइ ऐप, डिजिटल सेवा तैं गौं-गौं तक पौंछाणि च। यां से लोगुकि जिन्दगि असान ह्वेग्ये।

ऐ मौका पर राज्यसभा सांसद अर भाजपा प्रदेस अध्यक्ष महेन्द्र भट्ट, विधायक बंशीधर भगव, डॉ. मोहन सिंह बिष्ट, श्रीमती आशा नौटियाल, एक्सिस बैंका प्रबंध निदेशक अमिताभ चौधरी अर अपर सचिव मनमोहन मैनाली बि छायीं।