मुख्यमंत्रिन कायी विकसित कृषि संकल्प अभियाना सुरुवाता

मुख्यमंत्री धामिन आज गुनियाल गौं देरादूणम विकसित कृषि संकल्प अभियाना सुरुवाता कायी। अभियान जरिया कृषि वैज्ञानिक अर अधिकारी प्रदेस 95 विकासखण्ड, 670 न्याय पंचैत अर 11440 गौं का जिमदारु दगड़ि बात कराला।
मुख्यमंत्री धामिन बोलि कि अभियान क जरिया 29 मई बटि 12 जून तक सर्या देसम 700 से जादा जिलौं अर 2000 से जादा वैज्ञानिक दल डेढ़ करोड़ जिमदारु दगड़ि संवाद कारला।

मुख्यमंत्रिन बोलि विकसित कृषि संकल्प अभियाना जरिया जिमदारु तैं ऊंकी जमीन, जलवायुक् नुसार खेती-पाति नै तकनीका बारम जाणकारी दिये जाली। यांका दगड़ि खेती, पुशपालन, बागवानी जन्नि योजनों बारम बि जाणकारी दिये जाली।
मुख्यमंत्रिन बोलि कि प्रदेस सरकार प्रदेसा जिमदारु तैं तीन लाख रुप्या तक बिना ब्याज करजा दिंणु च। जिमदारु तैं खेती-पाति का औजार दियें जाणा वास्ता फार्म मशीनरी बैंक योजना क जरिया 80 प्रतिशत बानेस दिये जाणु च। ग्यूं मूल्यौंण पर एक कुंटल पर 20 रुप्यौं जादा दिये जाणा छन।

मुख्यमंत्रिन बोलि कि चाय बागन, धौलादेवी, मुनस्यारी अर बेतालघाट तैं जैविक च्या बागान बण्यें जाणु च। इन्न 6 एरोमा वैली बण्यें जाणि छन। ऐसु 200 करोड़ रुप्यौं कु बन्दुबस्त खास कैकि पॉलीहाउस बणौंणा खुणि करे ग्यायी। पाड़म खेती-पाति बरखा भरोसा च, यख खेती वास्ता 1000 करोड़ रुप्या उत्तराखण्ड क्लाइमेट रिस्पॉन्सिव रेन-फेड फार्मिग प्रोजेक्ट वास्ता मंजूर करे ग्येन।
प्रदेसम 1200 करोड़ रुप्यौं से बणण वलि सेब नीति, कीवी नीति, स्टेट मिलेट मिशन अर डैªगन फ्रूट नीति जन्नि योजना चल्यें ग्येन।

ऐ मौका पर मुख्यमंत्रिन या घोषणा कायी कि गुनियाल गौं म सामुदायिक भवन तैं टमणा कु काम अर सौंग नदी पर आरसीसी दिवाल अर चेकडैम बण्यें जालु।

ऐ मौका पर कैबिनेट मंत्री गणेश जोशी, भाजपा महानगर अध्यक्ष सिद्धार्थ अग्रवाल, सचिव कृषि एस.एन. पाण्डेय, महानिदेशक कृषि रणवीर सिंह चौहान, कुलपति पंतनगर विश्वविद्यालय डॉ. मनमोहन सिंह चौहान, कुलपति भरसार विश्वविद्यालय डॉ. प्रमेन्द्र कौशल बि छायीं।