विद्या भारती इस्कुळु मा संस्कार, सेवा भाव तैं जादा महत्व दिये जान्द: धामी

मुख्यमंत्री धामिन आज सरस्वती विद्या मंदिर मांडूवालम छात्रावास शिलान्यास कार्यक्रम मा भाग ल्यायी। मुख्यमंत्रिन शिलान्यासा मौका फर सबि बच्चों तैं बधै द्यायी अर बोलि कि छात्रावास इस्कुळ पढ़ण वळा नौन्याळु तैं रैंणा की सुविधा देलु।

मुख्यमंत्रिन बोलि स्वतंत्रता बाद सांस्कृतिक मूल्य अर राष्ट्रवादै भावना तैं दूबरा ज्यूंद करणा खुणि सरस्वती शिशु मंदिरा स्थापना करे ग्ये छायीं। मुख्यमंत्री सरस्वती विद्या मंदिर मांडूवाला का कक्षा 10 अर कक्षा 12 मा शत प्रतिशत बच्चों क पास हूंण पर बधै द्यायी।

मुख्यमंत्रिन बोलि प्रदेस सरकारन सर्या देसम सबसे पैलि नै शिक्षा नीति लागू कायी। प्रदेसम 141 पीएम श्री विद्यालय अर नेताजी सुभाष चन्द्र बोस आवासीय विद्यालय बण्यें जाणा छन। प्रदेसा 13 जिलों क 500 इस्कुळु वर्चअल कक्षा कक्ष कु बन्दुबस्त करे ग्यायी। सबि सरकरि इस्कुळुम एनसीईआरटी की किताब लग्यें ग्यींन।
मुख्यमंत्रिन बोलि प्रदेसम अबि तक 16 हजार इस्कुळु तैं नवाचार से जोड़ि याली अर हौरि इस्कुळ बि जल्दी हि ज्वड़े जाला।

मुख्यमंत्रिन बोलि कि विद्या भारत सर्या भारतम 12 हजार से जादा इस्कुळ चलौंणु च जैमा पैंतीस हजार से जादा नौन्याळ पढ़ै करणा छन। यु इस्कुळुम नै तकनीक अर गुणवत्तापूर्ण शिक्षा दियें जाणि च। यांका दगड़ि राष्ट्रभक्ति, नैतिक मूल्य, भारतीय संस्कृति, संस्कार अर समाजा प्रति जिम्मेबरि या बात इस्कुळु नौन्याळु तैं सिखौंणा कु काम करे जाणु च। उन्न बोलि विद्या भारती इस्कुळु मा चरित्र निर्माण, संस्कार अर सेवा भाव तैं जादा महत्व दिये जान्द।

ऐ मौका फर अखिल भारतीय कार्यकारी मंडला सदस्य सुरेश सोनी, राज्यसभा सांसद नरेश बंसल, विधायक सहदेव पुंडीर, अखिल भारतीय संगठन मंत्री शिवकुमार, क्षेत्रीय संगठन मंत्री विद्या भारती ( पश्चिमी उत्तर प्रदेश ) डोमेश्वर साहू, कुलपति दून विश्वविद्यालय प्रो. सुरेखा डंगवाल, नगर पालिका अध्यक्ष श्रीमती नीरू देवी, अध्यक्ष बाल आयोग गीता खन्ना अर हौरि लोग छायीं।