स्व. हरबंश कपूरा सर्या जिन्दगि जनसेवा कायी : धामी

मुख्यमंत्री धामिन आज छावनी परिषदा दप्तर गढ़ी कैण्ट मा उर्यूं कार्यक्रम मा भाग ल्यायी। ऐ मौका पर मुख्यमंत्रिन 12.51 करोड़ रुप्यौं से बण्यूं हरबंश कपूर मेमोरियल कम्युनिटी हॉल कु लोकार्पण कायी। मुख्यमंत्री पैलि स्व. हरबंस कपूर तैं नमन कायी अर बोलि ऊंकी सर्या जिन्दगि प्रदेस अर देरादूणा सेवा, विकास अर जनकल्याण खुणि रायी।

मुख्यमंत्री न बोलि कि स्व. हरबंश कपूरन सर्या जिन्दगि भर जनसेवा कायी। उन्न अपणा व्यवहार से हरेक मनखि कु ज्यूं मा खास जगा बणै। उन्न बोलि कि एमडीडीएक कु 12 करोड़ रुप्यौं से जादा कु बण्यूं सामुदायिक भवन सबि नै सुविधा छन। मुख्यमंत्रिन बोलि कि सामुदायिक भवन मा सबि लोगु तैं कम दाम पर असानी से मिल्यां, इन्नु बन्दुबस्त करे ज्यां।

कार्यक्रम मा एमडीडीए का उपाध्यक्ष बंशीधर तिवरी न बतै कि स्व. हरबंश कपूर मेमोरियल कम्युनिटी हॉल की बुनियाद मुख्यमंत्री धामिन डेढ़ साल पैलि धैरि छायीं अर एमडीडीएन बगत पर यु कम्युनिटी हॉल त्यार कायी। ऐ भवना गुणवत्ता कु खास ध्यान धरै ग्यायी।

ऐ मौका पर कैबिनेट मंत्री गणेश जोशी, विधायक श्रीमती सविता कपूर, ब्रिगेडियर आर.एस. थापा, अध्यक्ष महानगर भाजपा सिद्धार्थ अग्रवाल, श्रीमती नेहा जोशी अर हौरि लोग छायी।