प्रदेस सरकार विश्वविद्यालयों कु विकास वास्ता प्रतिबद्ध च : मुख्यमंत्री धामी

मुख्यमंत्री धामिन आज हेमवती नन्दन बहुगुणा गढ़वाल केन्द्रीय विश्वविद्यालय श्रीनगर म उर्यूं छात्रसंघ समारोह मा भाग ल्यायी। मुख्यमंत्री धामिन बोलि कि प्रदेस सरकार विश्वविद्यालयों कु विकास वास्ता प्रतिबद्ध च।

मुख्यमंत्रिन बोलि प्रदेस सरकार नैया-नैया काम अर योजनों क जरिया उत्तराखण्ड तैं अगनै बढ़ाणि च। उन्न बोलि उत्तराखण्ड देस कु पैलु प्रदेस च जख यूसीसी कानून लागू कर्ये ग्यायी, यु हम सबि उत्तराखण्ड रैवासियों खुणि गर्वा बात च। उन्न बोलि साढ़े तीन सालु मा प्रदेस सरकारन बाईस हजार से जादा ज्वानु तैं सरकरि नौकरी द्यायी। प्रदेसम बेरुजगारी दर 4.4 प्रतिशत कम ह्वे ग्यायी। उन्न बोलि उत्तराखण्ड नीति आयोग जारी सतत विकास लक्ष्यु क सूची म उत्तराखण्ड पैलि नम्बर पर च। मुख्यमंत्रिन बोलि कि नकल विरोधी कानून लागू कैकि हमन ऐतिहासिक फैसला कायी उन्न बोलि यां से मेनती अर प्रतिभाशाली छात्रु तैं ऊंकु हक मिललु। मुख्यमंत्रिन बोलि कि सरकार न अब मॉडल कॉलेज, ब्यटुळों खुणि छात्रावास, आईटी लैब, परीक्षा भवन, एस्ट्रो पार्क अर साइंस सिटी जन्नि परियोजना पर काम करणि च। यांका अलावा प्रदेसम स्टार्टअप खुणि वातावरण बण्यें ग्यायी।

कैबिनेट मंत्री धन सिंह रावतन बोलि कि प्रदेस सरकार शिक्षा क क्षेत्र तैं पैलि प्राथमिकता देंणि च। उन्न बोलि विश्वविद्यालय प्रशासन अर छात्रु तैं मिलिकैकि शिक्षा की गुणवत्ता तैं हौरि अच्छु बणौंणा दिसा म काम करण खुणि बोलि। उन्न बोलि कि सरकार छात्रु की हरेक तरौं से मदत करणा वास्ता त्यार च अर उच्च शिक्षा संस्थानु तैं विश्व स्तरीय बणौंणा खुणि खळाखळ कोसिस करणि च। ऐ मौका पर विधायक विनोद कण्डारी, केंद्रीय विश्वविद्याल का कुलपति अर हौरि लोग छायीं।