व्यावसायिक, उद्यमिता अर रुजगार देंण वलि शिक्षा तैं बढ़ावा दिये ज्यां : मुख्यमंत्री धामी
मुख्यमंत्रीधामिन आज सचिवालयम उच्च शिक्षा विभागा समीक्षा बैठक कायी। यीं बैठकम मुख्यमंत्रिन अधिकारियों तैं निर्देश दींन अर बोलि उच्च शिक्षा विभागम छात्र-छात्राओं की उपस्थिति तैं बढ़ौंणा पर खास ध्यान दिये ज्यां। व्यावसायिक, उद्यमिता अर रुजगार देंण वलि शिक्षा तैं बढ़ावा दिये ज्यां। उच्च शिक्षा बिटि डिग्री लिंण वला ज्वानु तैं रुजगार से ज्वड़णा वास्ता ऊंका कौशल विकास पर खास ध्यान दिये ज्यां।
मुख्यमंत्रिन बोलि कि विदेसु मा मानव संसाधना दरकारानुसार ज्वानु तैं विदेसी भाषा दगड़ि कौशल विकासा प्रशिक्षण बि दियें ज्यां। मुख्यमंत्रिन बोलि कि उच्च शिक्षम गुणवत्तापरक अर रुजगार देंण वलि शिक्षा वास्ता प्राध्यापकों तैं बि नै तकनीका प्रशिक्षण दिये ज्यां।
मुख्यमंत्रिन बोलि विश्वविद्यालय अर महाविद्यालय की लाइब्रेरी म किताबियौंक् दगड़ि प्रयोगशालम जरुरी समाना पूरु बन्दूबस्त करे ज्यां।
मुख्यमंत्रिन बोलि कि विश्वविद्यालय अर महाविद्यालयम पढै़ करण वला मेधावी छात्रों तैं भारत दर्शन योजना क जरिया देस हौरि संस्थानु कु भ्रमण कर्यें ज्यां।
राष्ट्रीय शिक्षा नीतिक् नुसार प्रदेसम उच्च शिक्षा उन्नयन दिसाम खळाखळ काम कर्ये ज्यां।
मुख्यमंत्रिन बोलि कि उच्च शिक्षम बच्चौं कु भवेष्य तैं अच्छु बणौंणा वास्ता पाठ्यक्रम तैं नवाचार से ज्वड़े ज्यां।
मुख्यमंत्रिन बोलि कि छात्रु तैं प्रतियोगिता इमत्यान अर पाठ्यक्रमा किताब असनी से अर निःशुल्क दियंे ज्यां, यांका वास्ता ई-लाइब्रेरी सिस्टम तैं हौरि कटकुटु बण्यें ज्यां।
बैठक मा उच्च शिक्षा मंत्री डॉ. धन सिंह रावत, उपाध्यक्ष अवस्थापना अनुश्रवण परिषद विश्वास डाबर, मुख्य सचिव आनंद बर्द्धन, प्रमुख सचिव आर.के. सुधांशु, आर.मीनाक्षी सुंदरम, डॉ. रंजीत सिन्हा बि छायीं।